Të varfër, por me kursime. Edhe pse shumica e qytetarëve e kanë të vështirë të përballojnë kostot e larta të jetesës në Shqipëri, sipas të dhënave nga Banka e Shqipërisë, kursimet e shqiptarëve kanë arritur në rreth 1.5 trilionë lekë deri në fund të muajit korrik.
“Rritja e depozitave, në fakt, është një fenomen tipik i shoqërive që, do të thoja, nuk kanë një nivel të lartë zhvillimi. Pra, në përgjithësi, shoqëritë e varfra kursejnë shumë. Jo vetëm në Shqipëri, por edhe në vende të tjera. Kjo shërben jo vetëm për të krijuar një mbrojtje, le të themi, nga situata të vështira, por edhe nga pasiguritë e ardhshme, të paparashikueshme. Krijohet një lloj sjelljeje kursimtare”, tha Selami Xhepa, ekspert ekonomie
Në një ekonomi ku të ardhurat e ulëta i shtyjnë qytetarët të kursejnë, bizneset dhe konsumatorët me të ardhura më të larta përdorin më shumë kredinë, duke ushqyer aktivitetin ekonomik.
Bizneset, në veçanti, marrin kredi për të zgjeruar aktivitetin dhe investimet e tyre. Të dhënat e Bankës së Shqipërisë tregojnë se vetëm në muajin korrik, kredia e re për bizneset arriti në rreth 19 miliardë lekë.
“Në të gjithë historinë e tranzicionit shqiptar, në përgjithësi, njerëzit me të ardhura më të ulëta janë kategoria që është më shumë kursimtare, ndërkohë që ata që kanë të ardhura më të larta dhe bizneset janë më shumë të prirur drejt huamarrjes. Kjo do të thotë që konsumatorët dhe bizneset, në një farë mënyre, financojnë ekonominë dhe kjo është një sjellje normale për të gjitha ekonomitë e botës”, shtoi Xhepa.
Në fund, shifrat tregojnë një paradoks të ekonomisë shqiptare, ata që kanë më pak, përpiqen të kursejnë për të ardhmen, ndërsa ata që kanë më shumë, marrin kredi për të financuar të tashmen dhe për të zgjeruar ekonominë.
