Pas ziles së fundit, nxënësit në shkolla do të vijojnë me detyra, muzikë, teatër, kërcim dhe artizanat. Ministria e Arsimit ka përzgjedhur tashmë 408 institucione për zbatimin e programit “Pas Shkolle”.
“Kemi përgatitur 408 institucione, të cilat do të mirëpresin programin dhe zbatimin e fashave dhe klubeve të caktuara sipas shkollave. Janë përzgjedhur në varësi të kushteve, ambienteve dhe në përshtatje me interesat dhe kërkesat e nxënësve”, tha Herida Duro, zv.ministre e Arsimit.
Programi do të shtrihet në të gjithë ciklin parauniversitar, ndërsa aktivitetet do të ndryshojnë sipas grupmoshave.
“Nga klasa e parë deri në të pestën, nxënësit do të përfitojnë dy module: të bërit e detyrave dhe përmirësimin e njohurive të tyre, por edhe modulin e arteve dhe zejeve, në disiplina si teatri, muzika, kërcimi, artet figurative dhe artizanati”, shtoi Duro.
Në program do të angazhohen mësues të ciklit fillor, mësues në pritje në portal, mësues në pension, të sapodiplomuar, si dhe artistë e trajnerë të fushave përkatëse.
“Pagesa, 1 mijë lekë ora, besojmë se do të bëjë të mundur rekrutimin e një pjese të mirë të të sapodiplomuarve dhe të artistëve të rinj”, tha ajo.
Programi, Sipas zv. ministres së Arsimit, synon t’u vijë në ndihmë prindërve që punojnë dhe të largojë fëmijët nga varësia ndaj ekraneve. Regjistrimet do të hapen në sistemin SMIP, pasi të ketë përfunduar formimi i klasave. Kërkesa do të paraqitet nga prindi, ndërsa qëndrimi i nxënësve në shkollë parashikohet të zgjasë të paktën deri në orën 15:00.
