Partitë pro-pavarësisë në Skoci, Uells dhe Irlandën e Veriut kanë nënshkruar një Memorandum Mirëkuptimi, përmes të cilit angazhohen për forcimin e bashkëpunimit dhe të drejtës së popujve për vetëvendosje.
Marrëveshja është firmosur nga Partia Kombëtare Skoceze (SNP), Plaid Cymru dhe Sinn Féin. Në dokument theksohet se Skocia, Uellsi dhe Irlanda kanë histori, identitete dhe tradita politike të ndryshme, por se secili prej këtyre kombeve duhet të ketë të drejtën të përcaktojë të ardhmen e vet përmes mjeteve demokratike.
Partitë deklarojnë se synojnë të punojnë së bashku për më shumë ambicie politike, mundësi ekonomike dhe një zë më të fortë në përcaktimin e së ardhmes së popujve që përfaqësojnë.
Në memorandum thuhet se peizazhi politik në ishujt britanikë po ndryshon dhe se, për herë të parë, në Skoci, Uells dhe Irlandën e Veriut ka kryeministra që janë të angazhuar për pavarësinë nga Mbretëria e Bashkuar.
“Koha e Westminsterit po shkon drejt fundit”, thuhet në dokument, ku partitë argumentojnë se ekziston një alternativë më e mirë: kombe që bashkëpunojnë si të barabarta, duke ndarë ide dhe ekspertizë dhe duke ndërtuar marrëdhënie mbi respektin reciprok dhe interesat e përbashkëta.
Bashkëpunimi do të fokusohet në disa fusha, përfshirë:
-Një ekonomi më të fortë dhe më të drejtë, me politika për krijimin e vendeve të punës dhe reduktimin e pabarazive.
-Zhvillimin e burimeve energjetike, veçanërisht energjisë së rinovueshme, me synimin për të ulur faturat për familjet dhe bizneset.
-Bashkëpunimin europian dhe ndërkombëtar.
Tre partitë e cilësojnë Brexit-in si një faktor që ka dëmtuar ekonomitë dhe ka kufizuar mundësitë për qytetarët e tyre.
“Europa është shtëpia jonë e përbashkët dhe ne besojmë se e ardhmja e kombeve tona i përket Bashkimit Europian”, thuhet në memorandum.
Partitë angazhohen gjithashtu të punojnë për forcimin e marrëdhënieve me Europën dhe krijimin e mundësive të reja për tregtinë, investimet, kulturën dhe bashkëpunimin.
Në fund të dokumentit theksohet se asnjë qeveri e Westminsterit nuk ka të drejtë të bllokojë demokracinë apo të pengojë popujt të vendosin vetë për të ardhmen e tyre.
Megjithatë, palët pranojnë se kanë qëndrime të ndryshme kushtetuese dhe se secili komb do ta përcaktojë të ardhmen e tij në mënyrën dhe kohën e vet.
