Vendimi i kryeministrit spanjoll Pedro Sanchez për të thirrur zgjedhje të parakohshme vjen pas muajsh krizash të njëpasnjëshme, të cilat kishin kufizuar ndjeshëm kufijtë e qeverisë së tij.
Sanchez është përballur me presion në rritje për shkak të rasteve të korrupsionit që përfshijnë njerëz nga rrethi i tij i ngushtë politik dhe familjar, ndërsa rritja e ndjeshme e flukseve të emigracionit drejt Ceutës e ka rikthyer në fokus politikën e qeverisë për emigracionin.
Megjithatë, çështja e strehimit rezultoi vendimtare. Pakënaqësia e madhe sociale për shkak të rritjes marramendëse të çmimeve të qirave dhe mungesës së strehimit të përballueshëm arriti kulmin javën e kaluar kur koalicioni qeverisës, të cilit i mungon shumica parlamentare, nuk arriti të sigurojë votat e nevojshme për të miratuar masa të reja për strehimin.
Rastet e korrupsionit
Vetë Sanchez nuk përballet me akuza për korrupsion, por disa njerëz në rrethin e tij janë dënuar ose janë nën hetim.
Ish-zyrtari i lartë i Partisë Socialiste, Jose Luis Abalos, u dënua në qershor me 24 vjet burg për ryshfet dhe korrupsion. Në maj, policia bastisi zyrat e Partisë Socialiste si pjesë e një hetimi mbi një fushatë të mundshme shpifjeje kundër gjyqtarëve që dëgjonin raste që përfshinin të afërm të kryeministrit.
Midis tyre janë gruaja e tij, Begona Gomez , e cila akuzohet për korrupsion dhe abuzim me ndikimin, dhe vëllai i tij, David. Gjithashtu nën hetim është ish-kryeministri Jose Luis Rodriguez Zapatero . Të gjithë mohojnë çdo shkelje.
Presioni nga emigracioni
Një pikë e re e nxehtë ka qenë shpërthimi i mbërritjeve të migrantëve në Ceuta, enklavën spanjolle në Afrikën e Veriut. Dhjetëra mijëra migrantë mbërritën në rajon gjatë verës, ndërsa të paktën 141 persona humbën jetën gjatë kalimeve.
Madridi mobilizoi ushtrinë për të menaxhuar situatën, ndërsa një pjesë e madhe e emigrantëve u kthyen në Marok. Megjithatë, mijëra mbetën në Ceuta, duke krijuar probleme të rënda menaxhimi.
E djathta spanjolle e ka akuzuar qeverinë për inkurajimin e flukseve të migracionit përmes politikave të saj . Më herët këtë vit, Sanchez njoftoi një proces legalizimi për më shumë se një milion emigrantë pa dokumente, me qëllim integrimin e tyre në tregun e punës.
“Do të shkojmë në zgjedhje me Ceutën nën pushtim”, tha të hënën kreu i Vox, Santiago Abascal.
Kriza e strehimit
Megjithatë, presioni më i madh erdhi nga kriza e strehimit. Oferta e kufizuar e strehimit, e kombinuar me rritjen e turizmit, emigracionit dhe investimeve të kapitalit të huaj në tregun e pasurive të paluajtshme, ka çuar në një rritje të ndjeshme të çmimeve.
Pakënaqësia sociale arriti kulmin muajin e kaluar kur pensionistja 87-vjeçare Maria del Carmen Abascal u dëbua nga apartamenti ku kishte jetuar për 70 vjet. Pas reagimeve të forta dhe protestave masive, asaj iu lejua të kthehej në shtëpinë e saj.
Qeveria më pas paraqiti një paketë masash për të adresuar krizën e strehimit. Megjithatë, ajo nuk arriti të siguronte mbështetjen e nevojshme dhe legjislacioni u rrëzua. Humbja parlamentare ishte zhvillimi i fundit në një seri krizash që në fund e çuan Sanchezin të zgjidhte zgjedhje të parakohshme.
