Vetingu duket se po fundos të gjithë gjyqtarët dhe prokurorët e dosjeve të bujshme. Gjatë 20 viteve demokraci kanë ndodhur shumë ngjarje në vend, por që në asnjë rast autorët e vërtetë nuk kanë shkuar para drejtësisë. Dy ngjarjet më të bujshme janë padyshim shpërthimi në Gërdec dhe vrasjet më 21 Janar 2011. Për të dyja këto masakra nuk u prek asnjë zyrtar i lartë.
Deri më tani vetingu i ka larguar nga sistemi të gjithë ata që kishin në dorë këto çështje. Dje doli para Komisionit të Pavarur të Kualifikimit prokurori i Apelit, Edmond Hyka.
Ky i fundit është prokurori që dërgoi në Apel dosjen e Gërdecit, duke kërkuar që akuza për ngjarjen të bëhej vrasje. Bashkë me prokurorin Shkëlqim Hajdari, në ankimin e paraqitur në gjykatë, prokurorët e Apelit u shprehën se Gjykata e Shkallës së Parë që shpalli 9 zyrtarë të pafajshëm nuk ishte mbështetur në prova dhe se nuk ishin marrë parasysh një sërë provash të paraqitura në proces në shpalljen e vendimit përfundimtar. Por pavarësisht ankimimit, ata që realizuan Gërdecin dolën të larë.
Vetingu për Hykën
Prokurori Hyka doli dje para Komisionit të Pavarur të Kualifikimit. Përballë Komisionit ishte avokati i tij Jordan Daci, i cili dha shpjegimet e klientit të tij, prokurorit Edmond Hyka. Për prokurorin, ILDKP ka sjellë një raport negativ, por me një pikë pozitive, ku konstatonte se Hyka ka burime të ligjshme për të justifikuar pasurinë. Për apartamentin në Durrës blerë për 2 milionë lekë, prokurori ka deklaruar se e ka përfituar nga kontrata e shitblerjes në vitin 2005. Hyka, ka deklaruar burim krijimi për pasurinë në fjalë të ardhurat si avokat dhe kursime dhe pjesa takuese nuk është përcaktuar.
Sipas KPK-së, në deklaratën e bërë para detyrës si prokuror, Edmond Hyka ka deklaruar burim krijimi të ardhurat nga paga si avokat dhe të ardhurat nga babai nga disa prona. Për këtë pasuri, Komisioni tha se pas disa hetimeve, çmimi real i pasurisë përllogaritet 6 milionë lekë, ndërsa thekson se prokurori Hyka ka paguar një çmim 3 herë më të lirë. Në përfundim, Komisioni ka konstatuar pasaktësi në deklarimin për krijimin e kësaj pasurie, pasi nuk përputhen të dhënat e periudhës në deklarimin veting dhe të bërë më parë nga prokurori. Për pasurinë dyqan në plazh në Durrës, përfituar nga kontrata e shitblerjes në vitin 2005, me çmimin 500 mijë lekë. Komisioni ka ngritur dyshime në lidhje me çmimin e konstatuar, gjithashtu ka konstatuar mospërputhje, pasaktësi për vitin e krijimit të pasurisë në fjalë.
Relatori i çështjes tha se prokurori në deklaratën e bërë para nisjes së detyrës si prokuror ka deklaruar si vit krijimi vitin 2002, ndërsa në deklaratën veting ka deklaruar si vit krijimi kontratën e shitblerjes në vitin 2005. Për kriterin e pastërtisë së figurës, DSIK ka dërguar një raport ku e vlerëson pozitivisht prokurorin Edmond Hyka, duke mos konstatuar lidhje me persona të përfshirë në krimin e organizuar dhe nuk ka kontakte të papërshtatshme, duke vlerësuar përfundimisht që prokurori është i përshtatshëm për të vijuar detyrën.
Komisioni i Pavarur i Kualifikimit gjithashtu ka konstatuar të njëjtën gjë për Hykën. Lidhur me kriterin e aftësive profesionale, përgjithësisht ka një vlerësim pozitiv.
/a.r
