Presidenti i Republikës së Kosovës, Hashim Thaçi, priti sot në takim Sekretarin e Përgjithshëm të NATO-s, Jens Stoltenberg, me të cilin bisedoi për avancimin e marrëdhënieve ndërmjet institucioneve të Kosovës dhe NATO-s.
Në takim me sekretarin Stoltenberg, presidenti Thaçi vlerësoi punën e KFOR-it në Kosovë, duke thënë se me përkushtimin e tyre kanë arritur që të jenë institucioni më i besueshëm për qytetarët tanë.
“Kosova e vlerëson shumë rolin tuaj dhe gatishmërinë e shprehur për të krijuar një bazë për rritjen e bashkëpunimit tonë. Shteti ynë mbetet i përkushtuar për avancimin e marrëdhënieve me NATO-n, si në rrafshin politik, ashtu edhe praktik”, u shpreh presidenti Thaçi.
“Aspirata e vetme e Kosovës mbetet anëtarësimi në BE dhe NATO”, shtoi ai.
Presidenti Thaçi dhe sekretari Stoltenberg biseduan edhe për angazhimin e autoriteteve kosovare në luftën kundër terrorizmit dhe ekstremizmit fetar, për Forcën e Sigurisë së Kosovës, por edhe për dialogun me Serbinë dhe raportet fqinjësore me shtetet e Ballkanit Perëndimor.
Sekretari i Përgjithshëm i NATO-s, Jens Stoltenberg gjatë vizitës sot në Kosovë u takua edhe me kryeministrin Isa Mustafa, por edhe me komandantin e KFOR-it, Gjeneral Major Giovanni Fungo dhe përfaqësues të bashkësisë ndërkombëtare në Kosovë. Stoltenberg do të takohet edhe me zëvendëskryeministrin Branimir Stojanoviç dhe ministrin e Jashtëm të Kosovës, Enver Hoxhaj./b.d
