Postin e presidentit të vendit nuk e sheh si synim jetësor të tij por që thotë se marrëveshja mes dy partive PDK dhe LDK duhet të respektohet deri në fund. E bazuar në të, në fund të mandatit të presidentes Atifete Jahjaga, në krye të të parit të vendit parashihet të vijë Hashim Thaçi. Kështu ka thënë në një intervistë për TV Dukagjini, ministri i Punëve të Jashtme dhe zëvendëskryeministri i Kosovës.
“Nuk është ndonjë betejë e imja jetësore të jem apo të mos jem president i Republikës. Unë kam pasur mundësi dy a po tri herë deri tani të zgjidhem president, por natyrisht se ne do të respektojmë marrëveshjen me LDK. Si shumicë kemi 90 deputetë në Kuvendin e Kosovës – vlerësoj se zgjedhja e presidentit duhet të jetë një situatë e unifikimit të spektrit politik dhe qytetar, dhe assesi e ngatërresave dhe përplasjeve të paarsyeshme”, ka thënë Thaçi.
Thaçi më tej ka vlerësuar se aktgjykimi i Gjykatës Kushtetuese është këshillëdhënës për Qeverinë e Kosovës në lidhje me Asociacionin e komunave me shumicë serbe, duke paralajmëruar se ky opinion i kushtetueses do të respektohet plotësisht nga Qeveria e Kosovës.
Sipas tij, nuk do të ketë rinegocioim të marrëveshjes për bashkësinë e komunave, por që vetëm duhet respektuar opinioni i Kushtetueses për statutin dhe dekretin e Asociacionit.
“Ne kemi marrë përgjegjësitë tona ndërkombëtare me nënshkrimin e marrëveshjes për normalizimin e marrëdhënieve me Serbinë, ndërmjet Kosovës dhe Serbisë në prill të 2013. Ne do të respektojmë si Qeveri opinionin këshillues dhe rekomandues të Gjykatës Kushtetuese që gjatë nxjerrjes së dekretit dhe Statutit të respektohet në plotni Kushtetuta e vendit, dhe kjo do të ndodh”, ka thënë ministri i Jashtëm.
