Ministri i Jashtëm i Italisë, Antonio Tajani, është kërcënuar përmes një letre që ka mbërritur në orët e fundit në Farnesina.
Lajmin e kanë bërë të ditur mediat italiane, të cilat thonë se kjo ngjarje vjen pas sulmeve të fundit të anarkistëve ndaj ambasadave italiane në Berlin dhe Barcelonë (dhe më parë në Athinë) dhe marshimeve të dhunshme në Romë dhe Milano për të kërkuar nxjerrjen nga regjimi 41 bis të Alfredo Cospito (anarkisti i burgosur në burgun e Operas).
Ndërkohë autoritetet kanë marrë masa të shtuara sigurie, për të mbikqyrur ministrin pas kërcënimeve, por edhe institucionet italiane brenda dhe jashtë vendit.
Shkalla e sigurisë është rritur edhe për misionet diplomatike italiane anembanë globit.
Ditët e fundit në sy të anarkistëve ka përfunduar edhe nënsekretari i Drejtësisë, Lidhja e Veriut, Andrea Ostellari dhe për këtë janë siguruar eskorta sigurie.
Kujtojmë se që nga fundi i nëntorit 2022, dëme të shumta janë shkaktuar në godinat diplomatike italiane në Argjentinë, Bolivi, Gjermani, Greqi, Portugali, Spanjë dhe Zvicër, ku është përdorur vandalizëm dhe mjete shpërthyese.
Ndërkohë fatmirësisht lidhur me këto sulme nuk janë raportuar të lënduar./m.j
