I pari që dëshmoi në seancën e djeshme të gjyqit ndaj Emiljano Shullazit dhe grupit të tij, ka qenë ish-kreu i Hipotekës, Ilirjan Muho.
Ai pranoi takimet me Ylvi Beqajn dhe Shullazin, por tha se regjistrimi i ish-hotel “Vollgës” u bë gjatë kohës kur ai ishte me pushime, në 10- ditëshin e fundit të gushtit të vitit 2014.
“Panorama” zbardh dëshminë e plotë që dha dje në gjyq Ilirjan Muho.
Prokurorja: Gjatë vitit 2014, mbani mend ndonjë kërkesë nga Emiljano Shullazi dhe Ylvi Beqja për regjistrimin e ish-hotel “Vollga”?
Ilirjan Muho: Në 10- ditëshin e dytë të gushtit të vitit 2014, isha me leje dhe gjatë kësaj kohe është bërë kërkesë në Hipotekë për regjistrimin e ish-hotel “Vollgës”. U interesova te regjistruesit dhe mësova se procedura ishte bërë me anë të një shkrese nga Hipoteka dhe ishte firmosur nga zv/kryeregjistruesi. Procedura ishte normale dhe nuk vëreheshin shkelje. Më pas, u paraqitën në zyrë përfaqësuesit e palës së dëmtuar nga ky regjistrim. Ishte Alban Dabulla që përfaqësonte palën tjetër. Ata thanë se ishin të dëmtuar nga procedura. Menjëherë kam urdhëruar Zyrën Juridike të verifikojë pasurinë dhe pezullova procedurat. Pas kësaj, jam thirrur në takim nga Emiljano Shullazi dhe Ylvi Beqja. Njëri prej të dyve më telefonoi dhe u takuam. Ata u prezantuan që të dy si bashkëpronarë të ish-hotel “Vollgës”.
Prokurorja: Kush ju telefonoi nga të dy?
Ilirjan Muho: Nuk e mbaj mend mirë. Më tha vetëm, “hajde te kafja dhe takohemi”. Gjatë takimit paraqitën dokumentet dhe pas verifikimeve rezultoi se Emiljano Shullazi ishte bashkëpronar. Mirëpo, pezullimit i mbaroi afati ligjor.
Prokurorja: Pse e bëtë urdhrin?
Ilirjan Muho: Pezullimin e bëra se pala e cenuar kishte bërë rekurs në Gjykatën e Lartë dhe doja t’i jepja kohë vetes për të parë procedurat e regjistrimit./Panorama/a.m.
