Festat e fundvitit, krahas atmosferës festive dhe ngrohtësisë familjare, sjellin edhe kilogramët e shtuar. Sipas dietologëve, kjo ditë na lë pas afro 2 kg më shumë tek ata persona që janë të kufizuar në dietë, ndërsa të tjerë shtojnë deri në 4 kg.
“Vazhdon rutina e ngrënieve apo tavolinave të mëdha dhe të ekzagjeruara, por edhe në orët e vona. Zakonisht, personat që kanë një peshë normale dhe që hanë vakte rregullta gjatë vitit, marrja e kilogramëve është afërsisht 1-2 kg. Ndërsa ata që kanë një stil të çrregullt apo edhe vakte rutinë jashtë festave të çrregullt, arrijnë deri në 3-4 kg.”, thotë dietologia, Albana Daka.
“Ushqimet e përpunuara, të cilat janë pjesë e tavolinave dhe shtimi i sasive të sheqerit dhe kripës, po ashtu edhe alkooli, ndikojnë në organizmin në fusha të ndryshme. Të ulet sasia e karbohidrateve, të bukës së bardhë.”, vazhdon më tej dietologia.
Për të humbur kilogramët e tepërt rekomandohet të reduktohet vakti i bollshëm.
“Tek personat e moshës së tretë dhe të sëmurë kronikë, ne rekomandojmë gjithmonë që pas vaktit të mos ndenjen gjatë, por të bëjnë një ecje 20 minutëshe. Pas festave, kalojmë në vakte më të vogla; rekomandohen edhe regjimet fasting, që bëjnë detox të organizmit.”, tha Daka.
Sipas dietologëve, rekomandohet që këto ditë pas festave, krahas ushqimeve të lehta, sallatave, të konsumohet edhe shumë ujë.
