Që prej vitit 2013 asnjë vend nuk i është bashkuar Bashkimit Europian, e megjithatë Komisioni Europian i tha A2 CNN se zgjerimi është prioritet kyç. I pyetur mbi editorialin e përbashkët të Edi Ramës dhe Aleksandër Vuçiç në Frankfurter Allgemeine Zeitung për një qasje realiste dhe një model të ri të bashkimit të vendeve tona me Europën, një zëdhënës i Komisionit tha se nuk komenton mbi komente dhe spekulime dhe se zgjerimi është prioritet kyç i Bashkimit Europian.
“Siç e dini, ne kurrë nuk komentojmë mbi komente dhe nuk komentojmë mbi spekulime. Le të kujtojmë se zgjerimi është një prioritet kyç për këtë Komision. Ai është një nga mjetet më të fuqishme të BE-së për stabilitet, siguri dhe prosperitet të përbashkët. Ne jemi plotësisht të angazhuar për ta bërë zgjerimin realitet. Për këtë qëllim, ne mbështesim vendet e zgjerimit me të gjithë asistencën e nevojshme politike, ekonomike dhe teknike. Integrimi gradual tashmë po sjell përfitime konkrete edhe përpara anëtarësimit”, tha Komisioni Europian.
Të premten, më 27 shkurt, Edi Rama dhe Aleksandër Vuçiç, në emër të Shqipërisë dhe Serbisë, i thanë BE-së se nuk janë naivë. Përmes editorialit në Frankfurter Allgemeine Zeitung, ata e krahasuan me “mbyllje dere” mesazhin e Berlinit, Parisit dhe të tjerëve se para zgjerimit të radhës do të duhet të reformohet BE-ja.
“Politikanë kryesorë në Paris, Berlin dhe gjetkë kanë theksuar se reforma të brendshme mund të jenë të nevojshme për të siguruar që një BE e zgjeruar të mbetet e aftë për veprim vendimtar. Ne nuk jemi naivë. Këto argumente kanë peshë. […] Megjithatë, t’u thuash anëtarëve të ardhshëm se duhet të presin reformat e BE-së përpara se të bashkohen do të ishte e barasvlershme me mbylljen e derës: edhe më shumë fjalime solemne ku riafirmohet angazhimi për pranimin e anëtarëve të rinj, ndërkohë që në fakt ndodh pak ose aspak. Kjo do të ishte e gabuar, kundërproduktive dhe madje e rrezikshme në këto kohë”, shkruanin Rama dhe Vuçiç në editorial.
Në përpjekje për të treguar një qasje “win-win” me përfitime të ndërsjella, Rama dhe Vuçiç e quajtën propozimin e tyre një qasje realiste drejt BE-së, ku vendet e rajonit do të përfshiheshin në tregun e përbashkët rajonal dhe zonën Shengen. Kësisoj, sipas tyre, nuk do të ngarkohej arkitektura vendimmarrëse e BE-së dhe as do të ndryshonte ekuilibri i saj institucional, pasi nuk do të kërkoheshin të drejta vetoje, komisionerë shtesë apo deputetë të Parlamentit Europian, si dhe as ndryshime në strukturat e votimit.
