Ministria për Evropën dhe Punët e Jashtme ka publikuar një njoftim të përditësuar mbi situatën në Lindjen e Mesme, duke theksuar se përshkallëzimi ushtarak në rajon e ka bërë gjendjen e sigurisë të paqëndrueshme dhe të paparashikueshme.
Në deklaratë, Ministria këshillon fuqimisht shtetasit shqiptarë të shmangin çdo udhëtim drejt vendeve të rajonit deri në një njoftim të dytë.
Ndërkohë, për ata që ndodhen aktualisht në Lindjen e Mesme, rekomandohet të tregojnë vigjilencë maksimale dhe të shqyrtojnë me përparësi mundësinë e largimit përmes linjave ajrore, për aq kohë sa ato vijojnë të funksionojnë.
Shtetasit shqiptarë këshillohen gjithashtu të ndjekin zhvillimet përmes burimeve mediatike të besueshme dhe kanaleve zyrtare të informacionit, të respektojnë udhëzimet e autoriteteve lokale, si dhe të mbajnë dokumentet e udhëtimit dhe mjetet e komunikimit gjithmonë të gatshme.
Në rast nevoje, ata duhet të kontaktojnë përfaqësitë diplomatike dhe konsullore të Shqipërisë në rajon dhe të veprojnë sipas udhëzimeve të tyre.
Ministria paralajmëron se, në rast të përkeqësimit të mëtejshëm të situatës, mbyllja e hapësirës ajrore në një perimetër më të gjerë mbetet një mundësi reale, dhe fluturimet mund të anulohen pa paralajmërim.
Për çdo çështje që lidhet me fluturimet, qytetarët këshillohen të kontaktojnë drejtpërdrejt kompanitë ajrore përkatëse.
Autoritetet shqiptare janë në monitorim të vazhdueshëm të situatës dhe kanë garantuar se do të informojnë në kohë reale për çdo zhvillim të ri, duke vënë në prioritet sigurinë e shtetasve shqiptarë në rajon.
