Në lidhje me sulmin me eksploziv ndaj biznesit të ish-kandidatit të Partisë Demokratike për Shkodrën, Xhemal Bushatit, ka reaguar PD-ja.
Përmes një deklarate, Partia Demokratike ka dënuar sulmin ndaj pronës së Bushatit. Bëhet me dije se familja e Bushatit që banon në të njëjtën godinë, nuk ka lëndime fizike.
Sipas deklaratës së PD-së, “gjendja e sigurisë në Shkodër ka vetëm përkeqësim për shkak të aleancës së qeverisë me krimin”.
Deklarata e Partisë Demokratike:
Partia Demokratike dënon me ashpërsi sulmin me eksploziv ndaj pronës së kandidatit demokrat për bashkinë e Shkodrës Xhemal Bushati.
Për fat të mirë, familja e zotit Bushati, që banon në të njëjtën godinë, nuk ka lëndime fizike, por ngjarja është tronditëse për ta dhe për qytetarët e Shkodrës. Për fat të keq, gjendja e sigurisë në Shkodër ka vetëm përkeqësim për shkak të aleancës së qeverisë me krimin.
Partia Demokratike u kërkon organeve ligjzbatuese të zbulojnë përgjegjësit e këtij agresioni, që prek drejtpërsëdrejti zotin Xhemal Bushati, një nga personalitetet më të respektuar të qytetit të Shkodrës.
Kush mendon se mund të përkulë demokratët me sulme direkte ose indirekte, i ka bërë llogaritë gabim!
/a.r
