Shkrimtari spanjoll, Javier Cercas, e cilëson krizën e strehimit si një nga problemet më të mëdha sociale të Spanjës dhe shprehet se ajo nuk mund të zgjidhet me masa afatshkurtra apo me një dekret të vetëm.
Në një intervistë, Cercas argumenton se ekonomia spanjolle po rritet në aspektin makroekonomik, por kjo nuk po përkthehet në mirëqenie për qytetarët.
Sipas tij, problemi i banesave është veçanërisht i ndjeshëm, pasi çmimet e larta, mungesa e strehimit social dhe dëbimet nga banesat kanë shtuar pasigurinë për shumë familje.
Ai kritikon gjithashtu mënyrën se si qeveria e Pedro Sánchez ka ndërtuar shumicën parlamentare, duke u mbështetur te forca politike që nuk ndajnë të njëjtat qëndrime progresiste. Sipas Cercas, refuzimi i masave për strehimin tregon vështirësitë e këtij modeli qeverisës.
Shkrimtari thekson se kriza e banesave nuk është vetëm përgjegjësi e qeverisë aktuale, pasi problemi është krijuar ndër vite.
Megjithatë, ai thotë se nga një qeveri që e quan veten progresiste pritej një ndërhyrje më e madhe për rritjen e banesave sociale dhe mbrojtjen e shtresave më të pambrojtura.
Cercas e lidh krizën e strehimit edhe me gjendjen e demokracisë në Evropë. Sipas tij, qytetarët humbin besimin te institucionet kur qeveritë nuk arrijnë të zgjidhin problemet e përditshme.
Ai paralajmëron se demokracia mund të mbrohet vetëm nëse është në gjendje t’u përgjigjet nevojave konkrete të qytetarëve.
Për Cercas, zgjidhja nuk qëndron te liderët karizmatikë, por te politika të qarta, ligje funksionale dhe institucione që garantojnë shërbime publike, barazi dhe të drejtën për strehim.
