Partia e ekstremit të majtë Podemos ka arritur të fitojë bindshëm në Barcelonë në zgjedhjet lokale e rajonale që po zhvillohen në 13 nga 17 komunitetetet autonome të vendit dhe në mbi 8 mijë komuna.
Megjithatë tronditjen më të madhe Podemos e ka bërë në Madrid, dty ku edhe pse forcë e parë është Partia Popullore e kryeministrit Rajoy, ka arritur të dalë e dyta. Në fakt partia në pushtet arriti të marrë 21 vende, por Ahora Madrid, mbështetur nga partia e majtë Podemos, mori 20, dhe tani mund të formojë një koalicion me socialistët (PSOE) të cilët renditen të tretët.
Në këtë mënyrë, kryebashkiaku i ri do të jetë ai i Podemos.
“Është fillimi i fundit të bipartizmit. Partia Popullore e të djathtës dhe socialistët e PSOE kanë marrë rezultatet më të dobëta në histori dhe ndryshimi është i pandalshëm”, u shpreh lideri i Podemos, Pablos Iglesias duke folur për zgjedhjet e përgjithshme të nëntorit.
Partia Popullore e kryeministrit Mariano Rajoy mbetet parti e parë në vend. Por vota në Barcelonë e Madrid komentohet si një goditje e rëndë kundër masave shtrënguese të qeverisë.
Në këtë mënyrë, ashtu si në Greqi, edhe në Spanjë po paraqitet i njëjti skenar ku ekstremistët arritën të bindin popullsinë të votojnë kundër masave shtrënguese. Në të njëjtën situatë në Greqi, Syriza erdhi në pushtet. Megjithatë, në pak muaj qeverisje, qeveria e Tsipras është detyruar të devijojë nga disa prej premtimeve të bëra kundër masave shtrënguese.
Ekonomia spanjolle ka qenë një shqetësim kryesor për votuesit dhe shumë qytetarë janë të zemëruar për shkurtimet e shpenzimeve publike dhe korrupsionin politik.
