Para disa ditësh bëri bujë lajmi se Agon Channel u mbyll. OSHEE vendosi ndërprerjen me energji elektrike për shkak të detyrimeve të pashlyera. Pas disa muajsh ecejakesh gazetarët që nuk janë paguar prej më shumë se pesë muajsh lanë zyrat. Madje Qetsor Ferruni publikoi edhe një video ku shiheshin ambientet e braktisura të Agon Channel.
Por gazetarja Sonila Meço thotë se Agon Channel nuk është mbyllur.
“Oferta kam pasur, si këtu si edhe jashtë, kanë qenë gjithmonë faktikisht edhe kur kemi qenë në transmetim. Por unë jam ende në Agon Channel. Absolutisht, unë edhe gjithë figurat e tjera vijojmë të jemi në Agon Channel. Bejtja është, Lubonja, Sajmiri, Krasta të gjithë jemi. Për momentin ka një ndërprerje të energjisë elektrike, për shkak të pagesave, nuk është mbyllur kanali,” tha Meço për Bluetooth.
E pyetur a kanë pasur probleme me pagat, ajo thotë:
“Patjetër që po. Njerëzit janë pa u paguar që në qershor, të gjithë. Llogaritë rrjedhëse janë bllokuar, s’ka si të paguhet. Është një punë dy vite që ne duhet ta mbrojmë. Për më tepër që ne jemi të bindur të gjithë që është një veprim i padrejtë. Sigurisht që është punë heronjsh”.
