Sali Berisha doli sot sërish në bashkëbisedim me ndjekësit në rrjetet sociale dhe, për herë të shtatë brenda javës, u tregoi shqiptarëve për takimet e tij në SHBA.
Në të njëjtën dalje, ai akuzoi SPAK-un se i shërben Edi Ramës dhe e paraqiti kryeministrin si të tmerruar nga mundësia e një përballjeje me drejtësinë.
Por momenti më domethënës nuk ishte as sulmi ndaj SPAK-ut, as rrëfimi i radhës për Amerikën. Ishte një pyetje nga “ndjekësja” Greta Beqiri.
Me pak vëmendje, rezulton se zonja Beqiri nuk është thjesht një qytetare që pyet nga rrjetet sociale, por punonjëse e zyrës së shtypit të PD-së, personi që shpërndan njoftimet e partisë në grupet e gazetarëve.
Pyetjet e porositura nuk janë risi në politikën shqiptare. I bëjnë të gjithë: kryeministra, kryetarë partish, ministra e deputetë. Por edhe propaganda kërkon pak kujdes. Edhe teatri kërkon pak regji.
Në rastin e PD-së, duket se as kjo nuk është bërë dot. Floriana Garo dhe ekipi i komunikimit mund të kishin gjetur të paktën një emër anonim, në vend që pyetjen “nga qytetarët” t’ia porosisnin zyrës së shtypit.
Kjo nuk flet për pazotësinë e Berishës në komunikim. Përkundrazi, ai ka qenë për dekada një nga politikanët më të aftë për të dominuar skenën publike.
Por sot duket i rrethuar nga njerëz kaq të paaftë, sa çdo dalje që duhet ta ndihmojë, përfundon duke e bërë qesharak.
Kur pyetjet “spontane” vijnë nga zyra e shtypit, problemi nuk është më vetëm mesazhi. Problemi është regjia./Vna/
