Deputeti i Partisë Demokratike, Oerd Bylykbashi, ka shpjeguar sot se si mund të mblidhet Kuvendi Kombëtar i PD dhe si do të verifikohen firmat e dorëzuara nga ish-Kryeministri Sali Berisha.
Në një lidhje direkte me emisionin “Opinion” në Tv Klan., Bylykbashi u shpreh se verifikimi i mandateve bëhet ditën kur mblidhet Kuvendi Kombëtar.
“Sigurisht që është bërë ftesa shumë e qartë, kush të dojë mund të shkojnë t’i shohin formularët janë aty. Janë më shumë se kërkesa statutore. Është bërë thirrja, është kërkuar data. Por verifikimi bëhet në datën 11 Dhjetor nga vetë Kuvendi nga komisioni i verifikimit që do të ngrihet atë ditë”, tha ai.
Më tej deputeti ka treguar detaje nga procedura e mbledhjes së Kuvendit Kombëtar, që nga verifikimi i kuorumit e deri tek hapja e punimeve.
“Pas verifikimit nga komisioni, nëse rast se është ¼, pra është bërë thirrja e Kuvendit. Pastaj verifikohet prezenca e më shumë se gjysmës së anëtarëve dhe kur kjo gjë ndodh, shpallet që Kuvendi është mbledhur dhe merren të gjitha vendimet”, shtoi ai.
Nga ana tjetër ftoi kreun e PD, Lulzim Basha, që të shkonte dhe të shihte firmat dhe më pas të shkonte dhe në Kuvendin Kombëtar.
“Atë ditë në Kuvend atë ditë kryetari i partisë dhe kryetari i seksionit janë të barabartë. Unë pres që zoti Basha të mos ketë siklet, të shkoj t’i shoh nuk ka kompetencë që t’i verifikoj, por mund t’i shikojë”, shtoi më tej ligjvënësi.
/a.r
