Janë pothuajse të përditshme grabitjet e shtëpive të barit në Angli nën pronësi të shqiptarëve.
Grabitësit janë kryesisht të rinj me ngjyrë të cilët kanë informacione të blera deri në £5000 stërlina për vendndodhjen e këtyre shtëpive ku rritet kanabis.
Sipas gazetës Luton Today të cilës i referohet Top Channel, një shqiptar i cili gjeti guximin të shkonte për të grabitur një shtëpi bari të disa shqiptarëve të tjerë është dënuar me 14 vite burg.
Oficerët u thirrën në orët e para të 3 marsit të vitit 2021 për shkak të raportimeve për të shtëna me armë dhe për përleshje në zonën e Hallwicks Road.
Përleshja ndodhi pasi burrat u përpoqën të hynin me forcë në një pronë që po përdorej si fabrikë kanabisi.
Mario Canaj, 39 vjeç, nga St James Court, Coventry, u dënua me 14 vjet burg më 1 dhjetor në Luton Crown Court.
Canaj u dënua për komplot për të prodhuar kanabis, posedim të një arme zjarri dhe kanosje.
Tre burra u vunë pas hekurave në vitin 2023 në lidhje me incidentin, përfshirë Gezim Brahimaj, 38 vjeç, nga Somersby Close, Luton.
Rreshterja detektive Jo Goodson, nga Njësia e Krimeve të Mëdha të Bedfordshire, Cambridgeshire dhe Hertfordshire, tha: “Ky rast tregon vendosmërinë dhe qëndrueshmërinë e pastër të oficerëve dhe stafit tonë.
“Kanë dashur pothuajse pesë vjet punë të palodhur për të siguruar këto dënime, duke përfshirë hetime të mundimshme dhe bashkëpunim midis ekipeve të shumta. Dhuna që shpërtheu atë natë ishte tronditëse dhe ne ishim absolutisht të përkushtuar për t’i sjellë përgjegjësit para drejtësisë. Këto dënime dërgojnë një mesazh të qartë se krimi i organizuar dhe përdorimi i armëve të zjarrit nuk do të tolerohen në Bedfordshire”, shtoi rreshterja Jo Goodson.
