“Ministri italian i Punëve të Jashtme falenderon Shqipërinë për vendimin për të mirëpritur 20 refugjatë të anijes ‘Diciotti’. Një sinjal i solidaritetit të madh dhe e miqësisë mjaft të vlerësuar nga Italia”.
Ky është mesazhi në Twitter që Ministria e Punëve të Jashtme ka postuar mbrëmjen e së shtunës teksa konfirmon pranimin e 20 emigrantëve nga pala shqiptare.
Deklarata vjen pak minuta pasi ministri shqiptar, Ditmir Bushati, u shpreh publikisht se vendi ynë është i gatshëm t’i japë një dorë Italisë, kryesisht për anijen e bllokuar në brigjet e Katanias.
Sakaq, situatat sanitare në anijen ‘Diciotti’ mbetet delikate. Autoritetet urdhëruan zbritjen e 17 personave, disa prej tyre të dyshuar se janë infektuar me tuberkuloz.
Dështimi në arritjen e një marrëveshjeje me BE-në për menaxhimin e emigrantëve të bllokuar në anijen e ankoruar në portin e Katanias ka futur në krizë Italinë.
Kryeministri Giuseppe Conte ka mbetur i paralizuar mes qëndrimit kategorik të dy zëvendësve të tij kundër zbarkimit të refugjatëve dhe përgjigjes së prerë të Brukselit, që refuzon ndarjen në kuota.
Conte shpresonte në gadishmërinë e vendeve anëtare, një shpresë kjo që rezultoi e kotë pasi përgjigjia e BE-së nuk linte vend për interpretime.
Ministri i Brendshëm Mateo Salvini propozoi identifikimin e emigrantëve në bordin e anijes dhe shqyrtimin po atje të atyre që mund të kenë të drejtë për azil.
Il Ministro degli Affari Esteri Enzo Moavero Milanesi ringrazia l’Albania per la decisione di accogliere 20 profughi della nave Diciotti. Un segnale di grande solidarietà e amicizia molto apprezzato dall’Italia 🇮🇹 🇦🇱
— Farnesina 🇮🇹 (@ItalyMFA) August 25, 2018
