Familja e autorit të masakrës me dy të vrarë dhe katër të plagosur në Dajç të Shkodrës është ngujuar nga frika e gjakmarrjes. Burime për Report Tv bëjnë me dije se familjarët e 33-vjeçarit Miklovan Parubi qëndrojnë me frikën e gjakmarrjes, pasi kanuni vijon të jetë ende prezent në këto zona dhe i druhen një kundërpërgjigje po me armë nga familjarët e dy personave që mbetën të vrarë mbrëmë në Dajç.
Ndërkohë, policia ka shtuar prezencën e saj në afërsi të banesës së Miklovan Parubit.
Situata bëhet më e vështirë, pasi autori i masakrës dhe viktimat janë nga e njëjta zonë dhe njiheshin me njëri tjetrin. Mësohet se familjarët kanë tërhequr nga morgu trupat e viktimave dhe kanë hapur dyert e mortit.
Një lojë pokeri dyshohet se ka qenë molla e sherrit që solli tragjedinë me 2 të vdekur e 4 të plagosur mbrëmjen e djeshme në Shkodër. Policia po vijon intensivisht kërkimet për kapjen e autorit të masakrës. Janë ngritur pika kontrolli në gjithë zonën. Dyshohet se Parubi mund të jetë larguar nga fshati.
ma.me
