Administrata e presidentit amerikan Donald Trump ka shtuar presionin ligjor në prag të zgjedhjeve të mesmandatit, duke nxitur një hetim penal për garën e Senatit në Alaskë dhe duke paralajmëruar se do ta çojë në Gjykatën e Lartë çështjen e më shumë se 20 mijë fletëve të votimit me postë në Kaliforni. Zgjedhjet e së martës, 3 nëntor, do të përcaktojnë nëse republikanët do të ruajnë kontrollin e Kongresit për dy vitet e fundit të mandatit të Trump.
Në Alaskë, prokurorët federalë po hetojnë nëse bashkëpunëtorë të kandidates demokrate Mary Peltola kanë nxitur një ish-mësues në pension, Daniel J. Sullivan Jr., të kandidonte për Senat për shkak të ngjashmërisë së emrit me senatorin republikan në detyrë, Dan S. Sullivan. Prokurori federal në Alaskë, Michael Heyman, tha se pas raportimit të gazetës “The New York Times” për këtë çështje, FBI-ja ka shtuar ndjeshëm burimet në dispozicion të hetimit, i cili po zhvillohet me intensitet. Peltola dhe ekipi i saj kanë mohuar çdo përfshirje, ndërsa edhe ish-mësuesi ka mohuar bashkëpunimin me fushatën e saj.
Gara në Alaskë konsiderohet e rëndësishme për demokratët, të cilët synojnë të marrin shumicën në Senat. Aktualisht, republikanët kanë 53 vende kundrejt 47 të demokratëve. Në zgjedhje janë në garë 35 vende në Senat dhe të gjitha 435 vendet në Dhomën e Përfaqësuesve. Ndërkohë, votimi i parakohshëm ka shënuar rekord, me mbi 51 milionë amerikanë që kanë votuar deri tani, përmes postës ose personalisht.
Në Kaliforni, një gjykatë federale apeli rrëzoi kërkesën e Departamentit të Drejtësisë për të veçuar fletët e votimit me postë të më shumë se 20 mijë votuesve, të cilët autoritetet dyshojnë se mund të mos jenë shtetas amerikanë. Zëvendësprokurori i përgjithshëm në detyrë, Trent McCotter, tha se administrata ka të ngjarë ta çojë çështjen në Gjykatën e Lartë përpara ditës së zgjedhjeve.
Presioni i administratës Trump ndaj autoriteteve zgjedhore nuk kufizohet vetëm në Kaliforni. Departamenti i Drejtësisë ka ngritur padi ndaj rreth 30 shteteve dhe Distriktit të Kolumbias, duke kërkuar listat e plota të votuesve.
Këto veprime kanë shqetësuar zyrtarët zgjedhorë, pasi Kushtetuta amerikane u jep shteteve kompetencën kryesore për organizimin e zgjedhjeve. Të premten, një gjykatës federal urdhëroi administratën të ndalojë kërcënimet për ndjekje penale ndaj zyrtarëve në Kaliforni që nuk zbatojnë udhëzimet e saj.
Guvernatori i Kalifornisë, Gavin Newsom, paralajmëroi gjithashtu se Departamenti i Drejtësisë mund të kërkojë sekuestrimin e fletëve të votimit përpara certifikimit të rezultateve, megjithëse tha se nuk kishte dijeni për ndonjë kërkesë konkrete. Ai argumentoi se një veprim i tillë do të përbënte ndërhyrje në procesin e numërimit.
Ndërkohë, përçarje janë shfaqur edhe brenda Partisë Demokratike në Miçigan, ku kandidati për Senat Abdul El-Sayed i ka kërkuar kongresmenes Haley Stevens, të cilën e mundi në zgjedhjet paraprake, të mos marrë pjesë në aktivitetet e tij deri në ditën e zgjedhjeve.
Stevens e mbështet kandidatin demokrat, por i ka kërkuar të dënojë një reklamë që fajësonte Izraelin për rritjen e çmimeve të ushqimeve dhe të kërkojë falje për deklaratat e tij të mëparshme për Izraelin. Sipas analistëve, kjo përçarje mund të dëmtojë fushatën në ditët e fundit, megjithëse sondazhet tregojnë se El-Sayed ka konsoliduar mbështetjen e votuesve demokratë.
Pavarësisht tensioneve dhe betejave ligjore, një sondazh i Reuters/Ipsos tregon se 76 për qind e votuesve amerikanë kanë besim se votat e tyre do të numërohen saktë, me nivele pothuajse të njëjta besimi mes republikanëve dhe demokratëve.
