Shtetet e Bashkuara kanë paralajmëruar Bashkimin Europian se mund të marrin masa kundër tij nëse BE-ja nuk heq rregullat që favorizojnë produktet e prodhuara në Europë.
Paralajmërimi amerikan lidhet me buxhetin afatgjatë të BE-së për periudhën 2028-2034, ku është parashikuar një fond prej 402 miliardë eurosh për konkurrueshmërinë. Ky fond synon të mbështesë prodhimin e mallrave strategjike brenda Bashkimit Europian, përfshirë pajisjet dhe industrinë e mbrojtjes.
Në një dokument të dërguar ligjvënësve europianë, Washingtoni shprehet se këto rregulla mund të dëmtojnë bashkëpunimin me SHBA-në.
SHBA paralajmëron se, nëse BE-ja zgjeron masat që favorizojnë prodhimin europian në fondet e mbrojtjes, do të shqyrtojë masa kundër vendeve europiane. Mes tyre përmendet edhe heqja e disa përjashtimeve që aktualisht u lejojnë kompanive europiane të marrin pjesë në prokurimet amerikane të mbrojtjes.
Washingtoni kërkon që BE-ja të mos përdorë vetëm parimin “Made in Europe”, por një sistem “Made with Europe”. Në sektorin e mbrojtjes, SHBA propozon një qasje më të gjerë, të bazuar në parimin “Made in NATO”, që do të përfshinte edhe vendet e tjera aleate të NATO-s.
Debati zhvillohet në një kohë kur marrëdhëniet tregtare mes SHBA-së dhe BE-së janë tensionuar. Dy palët kanë pasur përplasje për tarifat, rregullat mjedisore dhe ligjet europiane për sektorin dixhital.
Politika e BE-së për të favorizuar prodhimin dhe blerjet e përbashkëta të armëve brenda Europës kishte shkaktuar më herët shqetësime në Washington. Tensionet tregtare janë shtuar gjatë administratës së dytë të Donald Trump, ndërsa SHBA dhe BE vazhdojnë përpjekjet për të ruajtur bashkëpunimin ekonomik dhe atë në fushën e sigurisë.
