Prokurorët, të cilët po hetojnë rrëzimin e helikopterit në Liqenit e Shkodrës, nuk i ka bindur dëshmia e parë e ushtarit të plagosur, Gerald Baramuça.
Ata kanë patur dyshime mbi vërtetësinë e pohimeve të tij, se nuk mbante mend asgjë nga aksidenti.
Për këtë arsye, oficerët e policisë do të rikthehen përsëri në Spitalin e Traumës për ta pyetur sërish atë, në lidhje me aksidentin ku humbën jetën pilotët, Floran Delia dhe Donald Hoxha, raporton Klan.
Në dëshminë e parë, Baramuça u tha hetuesve se nuk kujtonte asnjë detaj nga rrëzimi i helikopterit, duke lënë pa përgjigje shumë pikëpyetje të grupit hetimor.
Këtë të martë, ai kreu një ndërhyrje tjetër kirurgjikale në shpatull dhe gjendja e tij paraqitet e përmirësuar.
Paralelisht, nga Regjimenti i Farkës janë pyetur rreth 7 ushtarakë, të cilët kanë sqaruar pozicionin e tyre në këtë ngjarje.
Ata mësohet t’i kenë thënë grupit hetimor se është respektuar çdo procedurë që kryhet për fluturime të tilla dhe se helikopteri ka qenë në gjendje shumë të mirë teknike.
Mbështetje për hetimet ka dhënë edhe ambasadori francez në Tiranë, Bernard Fitussi.
Një ditë më parë, për këtë çështje, kryeprokurori Adriatik Llalla ka takuar presidentin Bujar Nishani dhe ministren e Mbrojtjes, Mimi Kodheli.
