Policia kufitare e Vlorës ka shpëtuar 4 persona që rrezikoheshin të mbyteshin në det. Bëhet fjalë për dy raste të ndryshme. Fillimisht kanë qenë 3 persona që kanë njoftuar policinë se kishin mbetur në mes të detit pasi skafi i tyre kishte pësuar defekt.
“Në rastin e parë, shërbimet e Policisë Kufitare të Vlorës ndërhynë menjëherë dhe bënë të mundur nxjerrjen në breg, në gjendje të mirë shëndetësore, të 3 shtetasve që kishin mbetur në det, për shkak se mjeti me të cilin lundronin, kishte pësuar defekt”, njoftoi policia.
Në rastin e dytë, u shpëtua një qytetar që i rrezikohej jeta për shkak detit të trazuar. Ai kishte shkuar për të bërë sërf.
“Në rastin e dytë, shërbimet e SPK Dhërmi ndërhynë për të nxjerrë në breg një shtetas të cilit i ishte rrezikuar jeta, teksa bënte sërf, për shkak të detit të trazuar. Ky shtetas është në gjendje të mirë shëndetësore”, njoftoi policia./
/a.r
