Ministria e Financave ka propozuar një projektligj të ri të kontabilitetit që sjell disa ndryshime në ligjin aktual nr. 25/2018 i cili është hedhur së fundmi për konsultim. Ndryshimet kryesore përqendrohen në raportimin financiar, përgjegjësitë e drejtuesve dhe qasjen ndaj transparencës. Sipas relacionit që shoqëron draftin projektligji synon të adresojë mangësitë e identifikuara gjatë zbatimit të ligjit nr. 25/2018 dhe të përmbushë detyrimet e reja nga acquis i BE-së për raportimin financiar, qëndrueshmërinë dhe transparencën fiskale.
Një nga ndryshimet që nënvizohet është formalizimi i raportimit të qëndrueshmërisë sipas Direktivës (BE) 2022/2464. Ky detyrim aplikohet vetëm për njësitë shumë të mëdha, që tejkalojnë mesatarisht 1,000 punonjës dhe të ardhura neto prej 450 milion euro, me hyrje në fuqi në formë deri në vitin 2028.
Sipas relacionit raportimi i qëndrueshmërisë do të kërkojë nga kompanitë që të japin detaje mbi ndikimet mjedisore, sociale dhe të qeverisjes, duke përfshirë aspekte si korrupsioni dhe ndikimi social. Projektligji vendos gjithashtu kufizime për kërkesat e informacionit në zinxhirin e vlerës, për të mbrojtur njësitë më të vogla nga kërkesat joproporcionale.
Një tjetër synim është përmirësimi i cilësisë dhe krahasueshmërisë së raporteve financiare.
Relacioni sjell në vëmendje se vendi ka përafruar legjislacionin e saj me Standardet Ndërkombëtare të Raportimit Financiar që nga viti 2008, duke i aplikuar ato edhe për ndërmarrjet e vogla dhe të mesme. Projektligji i propozuar synon të rrisë më tej nivelin e raportimit dhe përputhshmërinë me standardet ndërkombëtare.
Një risi tjetër është futja e detyrimit për raportimin publik të tatimit mbi të ardhurat (Country-by-Country Reporting), në përputhje me Direktivën (BE) 2021/2101. Ky raportim do të zbatohet vetëm për njësitë që operojnë në më shumë se një juridiksion dhe kanë të ardhura të konsoliduara mbi 750 milion euro në dy periudhat e fundit raportuese. Qëllimi është rritja e transparencës fiskale dhe reduktimi i shmangies tatimore.
Projektligji përfshin gjithashtu ndryshime teknike dhe qartësuese për konsolidimin e pasqyrave financiare, eliminimin e detyrimeve të panevojshme dhe unifikimin e terminologjisë ligjore, për të rritur sigurinë juridike dhe zbatueshmërinë.
