Ka nisur në orën 09:00 këtë të premte, 3 prill, seanca e katërt në radhë e gjykimit ndaj kryebashkiakut të Tiranës, Erion Veliaj dhe të pandehurve të tjerë të përfshirë në dosjen e tij.
Në ambientet e Gjykatës së Posaçme AntiKorrupsion janë parë duke u futur avokati Maks Haxhia, Plarent Ndreca dhe biznesmeni Elman Abule. Veliaj nuk do të jetë i pranishëm në sallë.
Seanca e shkuar, përfundoi pa u hapur shqyrtimi gjyqësor, njësoj si dy seancat e para.
Shkaku kryesor ishte mungesa e një prej avokatëve, çka e bëri të pamundur vijimin normal të procesit. Gjatë seancës pati përplasje mes prokurorit të posaçëm Ols Dado dhe mbrojtjes. Dado akuzoi të pandehurit dhe mbrojtjen për zvarritje të qëllimshme të procesit, duke theksuar se prej 8 muajsh gjyqi nuk po ecën për shkak të sjelljes së tyre.
Nga ana tjetër, avokati Ndreca e kundërshtoi këtë pretendim, duke deklaruar se nuk ka strategji për shtyrje, por përkundrazi, mbrojtjes nuk i është dhënë ende e plotë dosja për t’u përgatitur. Ai theksoi se procesi është shumë voluminoz dhe kërkon kohë për një mbrojtje të drejtë.
Në të njëjtën çështje me Erion Veliajn janë të përfshirë edhe 16 persona të tjerë.
Ndërkohë, në orën 13:00, Gjykata Administrative ka caktuar seancën gjyqësore lidhur me padinë e Veliajt ndaj prokurorit të posaçëm Ols Dado.
