Në mbledhjen e sotme Këshilli i Ministrave ka vendosur emërimin e 3 zëvendësministrave të rinj.
Mes zyrtarëve të emëruar është edhe ish-shefi i Shërbimit Informativ, kur ndodhën ngjarjet e 21 janarit 2011 Bahri Shaqiri.
Ai do të mbajë postin e zëvendësministrit të Transportit dhe Infrastrukturës.
Bahri Shaqiri u vu në krye të akuzave të ish-kryeministrit Sali Berisha, i cili e akuzonte Shaqirin si një prej “puçistëve” që organizuan grusht shteti në 21 janar 2011, kur 4 protestues të opozitës u vranë në demonstratë.
Po sot, qeveria emëroi Adela Shera Karapici zëvendësministër i Zhvillimit Ekonomik, Turizmit, Tregtisë dhe Sipërmarrjes.
Emërimi i tretë është ai i Roni Telegrafit në detyrën e zëvendësministrit të Bujqësisë, Zhvillimit Rural dhe Administrimit të Ujërave.
