Kryetari i komisionit për reformën në drejtësi, Fatmir Xhafaj ka organizuar një pritje mbrëmjen e sotme, pas miratimit projektit të reformës në drejtësi, me të gjithë aktorët e përfshirë në këtë proces. Por përfaqësuesit e Partisë Demokratike, me shumë gjasa nuk do të marrin pjesë në pritjen që pritet të zhvillohet në orën 19:00, në Pallatin e Brigadave.
Një ditë më parë, nënkryetari i Komisionit, Oerd Bylykbashi deklaroi se nuk ka ende një motiv për të festuar, pasi puna për demokratët nuk ka mbarur ende. Puna për demokratët duhet të pasohet nga i njëjti konsensus edhe për hartimin e 7 ligjeve, duke nisur nga ai i vetingut.
“Urojmë që në vend të festimeve pa mbaruar punën, të ndryshojë rrënjësisht qasja e forcës suaj politike për fazën e re të reformës, e cila do të na japë një Reformë në Drejtësi me legjitimitet përmes transparencës dhe jo fshehtësisë, gjithëpërfshirjes dhe jo përjashtimit, komunikimit të sinqertë dhe jo lojës së telefonit të prishur, dialogut dhe jo arrogancës, vullnetit të sinqertë dhe jo manovrave bizantine politike.”- deklaroi Bylykbashi.
ma.me
