Në mbledhjen e parë të Këshillit Koordinues të Diasporës, Kryeministri Edi Rama deklaroi paraditen e sotme se brenda muajit janar do të jetë gati, fatura e dëmeve nga tërmeti.
Teksa vlerësoi kontributin e dhënë nga diaspora, kreu i qeverisë bëri me dije se aktualisht vazhdon inspektimi në terren i inxhinierëve shqiptarë dhe të huaj.
“Ne urojmë që brenda janarit të kemi një faturë paraprake financiare të dëmeve të tërmetit, faturimi është një procesi që vazhdon. Pas kësaj do të fillojë edhe pjesë e vështirë e rindërtimit. Ne duam që të dalim më të fortë nga kjo situatë dhe falë procesit të rindërtimit të krijojmë një cilësi të re në marrëdhëniet me njerëzit por edhe në marrëdhënie të njerëzve me vendin”, u shpreh Rama.
Në vijim Kryeministri deklaroi se qysh pas tërmetit të 26 nëntorit, mbështetja e diasporës ka qenë ndër të parat, por nënvizoi se në 30 vitet e transformimit të Shqipërisë ka qenë investitori më i madh në Shqipëri.
Ai u zotua se fondet e diasporës do të shpërndahen me transparencë.
“Statistikat thonë se 86% e familjeve shqiptare kanë përfituar ndihmë financiare nga të afërmit jashtë. Miliona dollarë u mblodhën pas tërmetit. Duhet të bëjmë një sër iniciativash për t’i dhënë rol Diasporës për një forcë shumë të madhe. Sot kemi tre agjenci kombëtare të Diasporës. Së shpejti do të kemi edhe një qendër studimesh dhe publikimesh për arbëreshët”, deklaroi Rama.
/a.r
