Lufta midis Donald Trump dhe shtypit të lirë amerikan ka arritur një pikë të re kulmore, shkruajnë mediat e huaja.
Presidenti ka njoftuar, nëpërmjet mediave sociale, vendimin e tij për të ndaluar tre media kryesore për të marrë pjesë në konferenca dhe evente në Shtëpinë e Bardhë: rrjetin MsNow, emri i ri i kanalit historik dhe liberal amerikan të lajmeve MSNBC; gazetën online Politico, ndër më të informuarat mbi ngjarjet në Uashington; dhe CNN, e cila ka qenë nën vëzhgim që nga mandati i tij i parë, kur në vitin 2018 u shkarkua korrespondenti Jim Acosta, i cili u fajësua për bërjen e një pyetjeje të pakëndshme gjatë një konference për shtyp. Në atë kohë, rrjeti ngriti padi dhe akreditimi i gazetarit u revokua.
“Jam krenar të njoftoj se, me efekt të menjëhershëm, tre mediat nuk do të jenë më në Shtëpinë e Bardhë për shkak të përhapjes së vazhdueshme të lajmeve të rreme. Mediat nuk duhet të lejohen të shkruajnë ose raportojnë vazhdimisht gënjeshtra për presidentin, administratën dhe vendin. Të tjerë do të vijnë pas tyre”, shkroi Trump, megjithëse nuk është e qartë se në cilin moment kjo do të ndodhë, pasi nuk specifikoi se cili lajm e kishte zemëruar veçanërisht.
Kjo është sigurisht një tjetër përpjekje për të vënë në provë ‘mbrojtjet kushtetuese’ të garantuara nga Amendamenti i Parë. Në SHBA ka pasur incidente të panumërta të ngjashme: në shkurt të vitit 2025, për shembull, ai ndaloi gazetarët e Associated Press në shenjë hakmarrjeje për vendimin e agjencisë për të mos ndryshuar emrin e Gjirit të Meksikës në “Gjiri i Amerikës”. AP ka ngritur një padi dhe procedurat janë duke vazhduar.
Trump ka qenë gjithmonë intolerant ndaj mbulimit të lajmeve që ai i konsideron të pafavorshëm dhe ka një histori të gjatë të ngritjes të padive kundër mediave ( duke përfshirë New York Times, Wall Street Journal dhe BBC ) dhe gazetarëve individualë, të cilët ai i ka sulmuar si personalisht ashtu edhe në mediat sociale.
Megjithatë, është e habitshme që vetëm këtë mbrëmje, pak orë para njoftimit të Donald Trump në mediat sociale, botuesi i New York Times AG Sulzberger – gazetari 46-vjeçar dhe pronari i gjeneratës së katërt të gazetës së famshme Big Apple – pothuajse sikur të kishte ndjerë diçka, denoncoi armiqësinë e presidentit ndaj informacionit të lirë në një editorial të gjatë të botuar me rastin e 175-vjetorit të gazetës.
Një artikull i ashpër në të cilin Sulzberger kujtoi, ndër të tjera, se si Trump “akuzon gazetarët për tradhti, një krim i dënueshëm me vdekje. Ai personalisht padit organizatat e lajmeve kur mbulimi i tyre nuk është sipas dëshirës së tij. Dhe ai urdhëron administratën të përdorë mjetet e saj për të hetuar, thirrur në gjyq dhe ndjekur penalisht gazetarët, thjesht sepse bëjnë punën e tyre”. Përmes artikullit, ai e përcaktoi Trump drejtpërdrejt si: “Presidenti më anti-shtyp në historinë moderne të SHBA-së”.
