Kryeministri i Shqipërisë, Edi Rama, përshëndeti Asamblenë e NATO-s, e cila po zhvillon punimet në Tiranë që nga e shtuna. Rama u uroi mirëseardhjen pjesëmarrësve dhe tha se me anëtarësimin në NATO Shqipërisë iu hoq një kufi i vënë shekuj më parë.
““Shqiptarët i mbijetuan në një kufiri shumë serioz të botës. Për disa shekuj kufiri ishte bizantin, shumë shekuj otoman dhe së fundmi komunist. Kufiri që ndau botën e ka dominuar thellë profilin social, ekonomik dhe kulturor të Shqipërisë dhe shqiptarëve. Anëtarësimi në NATO që ishte një lloj largimi i kufirit nga ne ka qënë një Bing Bang historik që përcaktoi një të ardhme të re për popullin shqiptar për të ndërtuar prosperitet në kushte të qënësishme dhe të favorshme. Pasi e kemi mbushur vitin 7 në NATO sot kemi nderin të presim këtë asamble, me këtë rast në emër që qeverisë shqiptare uroj që kjo asamble këtu në Tiranë të jetë një sukses. Falenderoj kryetarin e delegaciont shqiptar në këtë asamble që ka realizuar një ëndërr shumë të vjetër, i mbetet të realizojë një ëndërr tjetër, një bazë të NATO-s në Shqipëri”, tha Rama.
Kryeministri shqiptar u shpreh se ndihet krenar që ka mbështetur kandidaturën e Malit të Zi atëherë kur të gjithë e shihnin me skepticizëm.
“Sot rajoni ynë mbetet hapësirë ku as BE, as NATO nuk janë shtrirë ende plotësisht, duke e lënë të paplotësuar nevojën për një Europë të kompletuar dhe tërësisht të lirë. Nënshkrimi i protokollit të anëtarësimit me Malin e Zi është një hap strategjik i aleancës për jetësimin e dyerve të hapura. Krenar që Shqipëria e ka mbështetur që në nisje hapjen drejt Malit të Zi dhe integrimin e Malit të Zi. Anëtarësimi shndërron detin Adriatik në një det të brendshëm për NATO-n. Do punojmë që edhe Maqedonia të ankorohet në kursin euroatlantik. Një shtet pa hierarki etnike dhe i integruar në NATO është faktor për një Ballkan në paqe, ngritja e procesit të pajtimit të brendshëm vetëm e shton nevojën e pranimit të NATO-s. Ne besojmë se integrimi i Kosovës është domosdoshmëri jo thjesht për Kosovën por për të gjithë familjen euroatlantike. Përfshirja e plotë e Ballkanit në NATO është një investim strategjik kapital dhe do të ishte përgjigjja më e qartë si për ambiciet gjeostrategjike të aktorëve të tjerë të rajonit, ashtu dhe për valën e kërcënimeve që vijnë nga Lindja e Mesme”, tha Rama.
Kryeministri e mbylli me një ftesë të pazakontë për një takim zyrtar, duke iu thënë të pranishmëve ta shijojnë përsëri Shqipërinë.
“Nëse jeni të kënaqur me qëndrimin në Shqipëri, klimën e saj dhe natyrën e bukur, atëherë kthehuni përsëri, këtë herë si vizitorë, sepse nuk keni parë asgjë akoma”, e mbylli Rama.
D.I.
