Presidenti rus, Vladimir Putin, pritet të mbërrijë këtë të martë në Pekin për një vizitë shtetërore, vetëm katër ditë pasi Donald Trump përfundoi qëndrimin e tij në Kinë.
Vizita e Putinit, e 25-ta në Kinë sipas mediave shtetërore kineze, shihet si një tregues i rritjes së ndikimit diplomatik të Pekinit në arenën ndërkombëtare. Ajo nënvizon gjithashtu marrëdhënien e ngushtë mes liderit rus dhe presidentit kinez Xi Jinping, të cilët janë takuar më shumë se 40 herë, shumë më tepër se Xi me çdo lider perëndimor.
Analistët vlerësojnë se pritja e dy figurave më të fuqishme botërore brenda pak ditësh është një sinjal i qartë i ambicieve të Kinës për të konsoliduar pozitën e saj globale. Sipas ekspertit të International Crisis Group, William Yang, Xi dëshiron t’i kujtojë Uashingtonit se Pekini ka aleanca të forta dhe nuk mund të izolohet lehtësisht nga SHBA-të.
Vizita e Putinit zhvillohet në një moment delikat për Kremlinin. Rusia po përballet me vështirësi ekonomike dhe mungesë progresi në frontin e luftës në Ukrainë, duke e bërë Moskën gjithnjë e më të varur nga Kina. Kjo po e transformon partneritetin e shpallur “mes të barabartësh” në një marrëdhënie më të njëanshme në favor të Pekinit.
Në prag të vizitës, Putin deklaroi se marrëdhëniet Rusi-Kinë kanë arritur “një nivel të paprecedentë”, duke theksuar rritjen e tregtisë dypalëshe dhe përdorimin pothuajse të plotë të rublës dhe juanit në transaksione, në vend të dollarit amerikan.
Nga ana tjetër, Ministria e Jashtme kineze deklaroi se miqësia mes dy vendeve do të “thellohet më tej” falë udhëheqjes strategjike të Xi dhe Putin. Këtë vit shënohen 30 vjet nga partneriteti strategjik mes Pekinit dhe Moskës dhe 25 vjet nga nënshkrimi i traktatit të fqinjësisë dhe bashkëpunimit miqësor.
Një nga temat kryesore të diskutimit pritet të jetë zgjerimi i bashkëpunimit energjetik. Në fokus mbetet projekti “Power of Siberia 2”, një gazsjellës prej 2 mijë e 600 kilometrash që do të transportojë 50 miliardë metra kub gaz rus drejt Kinës përmes Mongolisë. Projekti konsiderohet jetik për Rusinë, pasi synon të kompensojë humbjen e tregut evropian pas sanksioneve perëndimore.
Ndërkohë, vendet perëndimore vazhdojnë të kritikojnë Kinën për mbështetjen ekonomike ndaj Rusisë dhe eksportin e pajisjeve me përdorim të dyfishtë ushtarak. Që nga nisja e pushtimit të plotë të Ukrainës, Kina ka blerë mbi 367 miliardë dollarë lëndë djegëse fosile nga Rusia.
Lufta në Ukrainë mbetet një sfidë serioze për Moskën. Raportohet se sulmet ukrainase me dronë dhe raketa kanë dëmtuar rëndë infrastrukturën energjetike dhe objektivat ushtarake ruse, ndërsa zyrtarë rusë kanë nisur të pranojnë publikisht presionin ekonomik që po shkakton konflikti i zgjatur.
