Publikohet kontrata origjinale kompanisë “DIA” në pronësi të Kastriot Ismailajt, i vënë nën akuzë për korrupsion dhe ish-CEZ (sot OSHEE) në lidhje me marrjen e borxheve, për të cilën akuzohet kryeparlamentari Ilir Meta.
Siç raporton portali Newsbomb.al, kontrata është nënshkruar më 1 Shtator të vitit 2010 e quajtur “Marrëveshje për Shërbim në Mbledhjen e Borxheve” mes degës në Shqipëri të “DEBT INTERNATIONAL ADVISORY LTD” dhe OSHEE.
Kontrata është firmosur nga drejtuesit çekë, Presidenti i Bordit të Drejtorëve Josef Hejsek dhe Drejtorit të Sektorit të Financës Jan Ivan.
Në këtë mënyrë “DIA” kishte si përfaqësues të saj pikërisht Kastriot Ismailajn, i cili cilësohet si agjent i kompanisë.
Por në akuzat e bëra nga shkrimi i “BIRN” dhe Partia Demokratike thuhet se Meta ka favorizuar kompaninë e Ismailaj në këmbim të ryshfetit. Madje pretendohet se në atë kohë Meta ka mbajtur postin e Kryeministrit.
Në fakt është krejt e kundërta. Themelimi i kompanisë “DIA” është më 5 Korrik të 2010, ndërsa regjistrimi i saj në QKR është më 4 Gusht të po atij viti. Kontrata mes “DIA” dhe CEZ është firmosur më 1 Shtator të 2010 kohë kur Meta nuk ishte Kryeministër por Ministër i Jashtëm.
Përpos akuzave, madje Meta në atë ditë nuk ka qenë fare në Shqipëri por në Honduras gjatë së cilës është deklaruar edhe njohja e Pavarësisë së Kosovës, një nga hapat më të rëndësishëm të cilësuar në atë kohë përpara vendimit të Gjykatës Speciale Serbi-Kosovë.
Mbi të gjitha në atë kohë në krye të OSHEE ishte Said Dollapi i PD-së. Nuk dihet se përse emri i Metës është përfshirë në këtë histori nga avokatët e OSHEE, por dihet tashmë se e njëjta kompani që mbron aspektin ligjor të OSHEE është po e njëjta e përcaktuar nga PD kohë kur OSHEE e drejtonte Dollapi.
Por datat e publikuara nga kontrata origjinale, hedhin poshtë akuzat për favorizimi dhe ryshfet nga ana e Metës.
