Partia Demokratike dhe Partia Socialiste kanë vijuar edhe sot ritualin e përditshëm të akuzave dhe kundërakuzave në distancë në kuadër të fushatës elekorale.
Nga ana e saj PS ka denoncuar lejen e dhenë nga kreu i PD Lulzim Basha për shtesën e një kati në pallatin ku jeton.
Ndërsa në përgjigjen e saj PD e ka cilësuar Veliajn si papagall të Ramës i cili po përsërit premtimet e pambajtura të qeverisë.
PD: Veliaj papagall i Ramës
Partia Demokratike vijon deklaratat e saj kundër kandidatit të ASHE-së për kryetar të Bashkisë së Tiranës, Erion Veliaj, duke vënë në shënjestër punën e tij si Ministër i Mirëqenies Sociale.
Asllan Dogjani e ka quajtur Veliajn, papagall të Ramës, që sipas tij po përsërit premtimet e pambajtura të dy viteve më parë.
“Le të shohim punën dhe jo fjalët. Erion Veliaj, si papagall i Ramës, po përsërit premtimet e pambajtura të dy viteve më parë, por tani me ambalazh të ri për Tiranën. Në 2013 i premtoi qytetarëve: “Uljen e taksave për 95% të popullsisë.” Ky premtim doli fjalë boshe dhe mashtrim. Pse nuk janë ulur taksat për 95% të popullsisë? Pse shqiptarët ndërkohë që kanë pagat dhe pensionet më të ulëta në Evropë kanë edhe taksat më të rritura në Ballkan? Veliaj ishte Ministri që kishte plot 40% të buxhetit të shtetit për plotësimin e premtimeve, por që rezultuan vetëm fjalë dhe mashtrime, të cilat po ia përmendim çdo ditë qysh prej 4 javësh. Z. Veliaj dëshiron të rrisë taksat se mendon që kjo është zgjidhja, ndërsa ne besojmë se ulja e taksave dhe nxitja e biznesit të ndershëm sjell punësim”, ka thënë Dogjani. Sipas tij, shqiptarët ndihen sot të mashtruar nga papagalli i Edi Ramës që vetëm flet, por nuk realizon asgjë. “Erioni ka veç fjalë por nuk punon për hallet e njerëzve. Ka 4 javë që çdo ditë po i kujtojmë Erionit nga një tjetër premtim të thyer dhe nga një tjetër mashtrim. Votuesit meritojnë më shumë se fjalë dhe Erioni nuk mund të ofrojë asgjë veç fjalëve boshe dhe rritjes së taksave”, përfundoi deputeti demokrat.
PS: Si mundet një kryetar bashkie në detyrë të shkelë ligjin dhe planin rregullues që ai vetë ka miratuar për përfitim e tij personal
Partia Socialise ka vijuar edhe sot akuzat për kreun e Bashkisë së Tiranës Lulzim Basha për premtimet e pambajtura dhe lënien pas dore të kryeqytetit. Në një dalje për mediat, deputetja e PS Olta Xhaçka ka denoncuar sot lejen e dhënë nga Basha për shtesë kati në pallatin që ai jeton.
Deklaratë për media e deputetes së PS, Olta Xhaçka:
Qytetarët me të drejtë pyesin se çfarë ka bërë Lulzim Basha si kryetar i Bashkisë së Tiranës. Sot më në fund mësuam se pas 4 vjetësh që fjeti vetëm gjumë, Lulzim Basha paska bërë një gjë: i ka dhënë vetes së tij leje për të bërë shtesë kati në pallatin ku jeton. I ka dhënë vetes leje që duplexin ku jeton ta kthejë në triplex në kat të 13. Ky është realisht një skandal i pabesueshëm, nga ato që vetëm Luli di të prodhojë. Disa vjet më parë njerëzit e tij ndërtuan një pallat në mes të detit. Sot Luli po e vazhdon traditën duke zaptuar e duke shpallur si shesh ndërtimi tarracën e pallatit ku jeton. Pyetja që kanë sot qytetarët e Tiranës është si mundet një kryetar bashkie në detyrë të shkelë ligjin dhe planin rregullues që ai vetë ka miratuar për përfitim e tij personal? Si mundet një kryetar bashkie në detyrë që të miratojë një leje ndërtimi në një pronë kolektive të banorëve të pallatit duke rrezikuar sigurinë e çdo familje që jeton në atë pallat? Është një turp që pikërisht kryetari i Bashkisë së Tiranës, autoriteti që duhet të garantojë respektimin e ligjit dhe zhvillimin e territorit të kryeqytetit është po ashtu i pari që e shkel ligjin me të dyja këmbët. Nuk e dimë nëse praktika e ndërtimit në kat të 13 është një praktikë që Luli e ka zbuluar në Holandë. Por është një fat i madh për Tiranën që Luli ka fjetur gjumë gjatë pjesës dërrmuese të mandatit të tij. Në 21 qershor këtij modeli të dështuar i vjen fundi. Pas vetëm 18 ditësh, qytetarët e Tiranës do të votojnë masivisht për ta çuar kryeqytetin në drejtimin e duhur.
