Duket se ashpërsimi i legjislacionit për ata që luftojnë në konflikte në vende të huaja, dhe krimet monstruoze të ISIS kanë sjellë reflektim tek shqiptarët.
Pasi u vumë përballë nje fenomeni të rrezikshëm në periudhën 2011-2013, kur disa shtetas shqiptar shkonin për të luftuar në Siri, duke i’u bashkuar terroristëve, tashmë situata ka ndryshuar.
Prej fillimit të vitit 2014, kur edhe nisi proçedimi penal ndaj grupit të rekrutuesve të drejtuar nga dy imamët e Unazës dhe Mëzezit, nuk raportohet ti jetë drejtuar Sirisë asnjë luftëtar shqiptar.
Ky informacion është dhënë nga Ministri i Brendshëm Saimir Tahiri, në një takim për luftën antiterror në rajonin e Ballkanit që po mbahet në Tiranë.
Në këtë takim të rëndësishëm u diskutuan tema të rëndësishme me informacion konfidencial dhe nuk u lejuan mediat. Sipas Tahirit, ndikim për frenimin e luftëtarëve shqiptar ka luajtur legjislacioni i ashpërsuar.
Tryeza ku marrin pjesë përfaqësues nga Bullgaria, Bosnja, Maqedonia, Kosova dhe Kroacia do të zgjasë deri në datë 19 nëntor.
Fokusi i diskutimeve do të jetë ndërmarrja e veprimeve të përbashkëta dhe shkëmbimi i informacionit në luftën kundër terrorizmit.
