Qeveria e SHBA-së ka vendosur sanksione ekonomike ndaj Svetozar Marovic, Presidentit të shtetit të përbashkët të Serbisë dhe Malit të Zi nga viti 2003 deri në vitin 2006.
Po ashtu, Marovic ka shërbyer si ish-zv/President i Partisë së Demokratike të Socialistëve të Malit të Zi deri në vitin 2015.
Sipas Departamentit amerikan të Thesarit “Marovic përcaktohet në bazë të E.O. 14033 sepse ka qenë përgjegjës ose bashkëpunëtor në ose për përfshirje të drejtpërdrejtë ose të tërthortë në korrupsion lidhur me Ballkanin Perëndimor, përfshi korrupsionin nga, në emër të, ose të lidhur me një qeveri në Ballkanin Perëndimor, apo një zyrtar aktual ose të kaluar qeverie, në çfarëdo niveli të qeverisjes në Ballkanin Perëndimor, siç është përvetësimi i pronave publike, shpronësimi i pronave private për përfitime personale ose qëllime politike, apo ryshfete”.
Marovic u arrestua nga autoritetet malazeze në 2015 në bazë të dyshimeve për përfshirje në raste korrupsioni në shkallë të gjerë lidhur me projektet e ndërtimit në bashkinë e Budvës.
Prokurorët malazezë e akuzuan Marovicin se përdori ndikimin e tij si zyrtar i lartë në DPS për të miratuar një sërë blerje pronash dhe ujdish ndërtimi, të cilat sollën përfitime të mëdha për disa kompani, por shkaktuan humbje të konsiderueshme për qeverinë vendore.
Në vitin 2016, Marovic nënshkroi dy marrëveshje për pranimin e fajësisë, duke pranuar të gjitha akuzat kundër tij për korrupsion. Ai u dënua me disa vite burg dhe u urdhërua t’i kthente shtetit mbi 1 milion Dollarë, por u arratis në Serbi përpara se të vuante dënimin.
Marovic është një prej shtatë personave ndaj të cilëve Departamenti i Thesarit vendosi sanksione. Mes të sanksionuarve janë edhe Aqif Rakipi dhe Ylli Ndroqi nga Shqipëria.
/a.r
