Kur një futbollist i njohur Manchester United pa Bastian Schweinsteiger te dhomat e zhveshjes së skuadrës U-21, e pyeti gjermanin: “Çfarë dreqin po bën aty?” Ndoshta kjo është pyetja që kampioni i botës i bën vetes çdo ditë. Tetë herë fitues i Bundesliga, Schweinsteiger nuk është më duke biseduar me Wayne Rooney dhe David de Gea, por e sheh veten i rrethuar nga të rinjtë e United. Të enjten, më 28 korrik, Schweinsteiger mbërriti në kompleksin stërvitor në Carrington. Kishte pasur zëra se e ardhmja e tij në klub ishte në dyshim, por ajo që ndodhi në ditët në vijim ishte me të vërtetë befasuese…
Trajneri i ri, Jose Mourinho, tha publikisht se karriera e gjermanit te Manchester United kishte mbaruar dhe se prej kohësh i ishte komunikuar menaxherit të tij që të kërkonte një ekip tjetër, sepse nuk do të stërvitjen më me ekipin e parë. Schweinsteiger u informuar se mund të stërvitej me ekipet U-19 dhe U-21 për të ruajtur formën deri në momentin e transferimit. Ishte një poshtërim për një lojtar të këtij niveli dhe vëllai i tij Tobi shkroi në “Twitter”: “No respect.” Që nga ajo ditë, Schweinsteiger ka ndjekur një fazë përgatitore individuale në Carrington, si figurë e izoluar, por jo si në rastin e Victor Valdes. Spanjollit i shkoi edhe më keq kur refuzoi urdhrin e Van Gaal për të luajtur me ekipin U-21. Portierit iu dha një program i shkruar dhe orari i tij në klub nuk duhet të përkonte kurrë me atë të ekipit të parë.
Trajtimi që Mourinho i ka bërë Schweinsteiger ka qenë në kufijtë e të lejueshmes dhe dihet që gjermani nuk e shijon më jetën në Manchester. Bashkëshortja e tij, tenistja Ana Ivanovic, ka qenë në Lojërat Olimpike dhe Bastian ka qenë vetëm, por gjithsesi është takuar me disa shokë të skuadrës së parë, të cilët e kanë ruajtur simpatinë për mesfushorin. Jesse Lingard është parë duke darkuar me Schweinsteiger, ndoshta ka marrë ndonjë këshillë si të bëhet kampion i madh, por edhe mos të gjendet në situata si ajo e ish-mesfushorit të Bayern në “Old Trafford”. Schweinsteiger shkoi te United me bindjen se do të linte gjurmë në Premier League, por dëmtimet dhe forma e dobët e kanë penguar në synimin e futbollistit që u martua në Venecia gjatë muajit të kaluar.
Alarmi duhet të kishte rënë që kur Bayern e lejoi të largohej për vetëm 10 milionë euro dhe Pep Guardiola deklaroi se gjatë tre viteve për asnjë moment nuk e kishte pasur Schweinsteiger në gjendje të mirë fizike. Blerja e Schweinsteiger u pa si sinjal i kthesës në merkato nga “djajtë”, por shkeli rregullin dhe këshillën e dhënë nga Sër Alex Ferguson. Që nga viti 2010, Manchester United ka blerë vetëm tre futbollistë mbi 27 vjeç. I pari ishte Van Persi, i marrë 29 vjeç nga vetë Ferguson. I dyti ishte pikërisht Schweinsteiger, ndërsa i tretë Zlatan Ibrahimovic, i ardhur gjatë kësaj vere. Schweinsteiger luajti vetëm 13 ndeshje në Premier League, për herë të fundit është parë në fushë kundër Sheffield United në Kupën e Anglisë, në janar. Përkushtimi i tij ngjalli dyshime edhe mes futbollistëve dhe Van Gaal hoqi dorë prej tij raporton BW. Schweinsteiger, nga ana e tij, nuk ka qenë kurrë i përshtatur me lojën e kërkuar nga Van Gaal.
Mourinho, sapo mori drejtimin e ekipit nxitoi të sqaronte se Manchester United do të mbante vetëm një mesfushor me përvojë dhe ai do të ishte idhulli i tifozëve, Michael Carrick. Por problemi për “djajtë” është se kanë në bordero një 32-vjeçar kampion bote që është përzënë nga Guardiola dhe Mourinho dhe do të paguhet me 200 mijë euro në javë deri në qershor 2017. Në dy vitet e ardhshme, nëse ai nuk firmos për një klub tjetër, Manchester United do të paguajë 20 milionë euro për Schweinsteiger. Gjithsesi, gjasat më të mëdha janë që Schweinsteiger të largohet./a.m.
