Ashtu siç ishte paralajmëruar në Pezë kanë nisur sot aktivitet e shumta në përkujtim të Konferencës së Pezës, duke e kthyer atë në vendin e festave që do të zgjasë për tri ditë me radhë.
Nën kujdesin e Bashkisë së Tiranës, Peza është transformuar e tëra për të pritur qytetarët e shumtë që priten të marrin pjesë në organizimet dhe lojërat festive. Në këtë kuadër, Bashkia ka vendosur çdo ditë nga ora 11:00 autobusë falas pas Teatrit të Operas dhe Baletit. Këto autobusë do të vijojnë të jenë falas deri më datë 16 Shtator, e cila do të jetë edhe e fundit e organizimit “Peza n’fest”.
Kështu, gjatë ditës së sotme qindra qytetarë, mes të cilëve të rinj dhe të reja, kanë marrë pjesë në lojërat e organizuara. Po ashtu qytetarët morën pjesë në shfaqjet e cirkut, Panairin e Produkteve vendase, ekspozitë fotografie dhe vizita në muzeun e Pezës
Sipas organizatorëve, pjesëmarrja sot ka qenë e mirë ndërsa ditën e nesërme priten edhe më tepër qytetarë.
Kalendari
15 SHTATOR – Parku i lojrave, Panairi i Produkteve vendase, ekspozitë fotografie dhe vizita në muzeun e Pezës. Shfaqje cirku dhe Parku i përrallave nga ora 13:00. Zjarre Partizane nga ora 18:00.
16 SHTATOR – Parku i lojrave, Panairi i Produkteve vendase, ekspozitë fotografie dhe vizita në muzeun e Pezës. Shfaqje cirku dhe Parku i përrallave nga ora 13:00. Zjarre Partizane dhe Kori “Lira” nga ora 18:00. Koncerti ndodh në Parkun e Pezës me Fanfara Tirana dhe Robert Bisha, Special Guest – Dudu Morandi ( Modena City Ramblers) Gipsy Groove dhe Dj Jehonë nga ora 20:00.
