Një person ka humbur jetën këtë të martë në Vlorë, në ambientet e një kompanie pranë rrugës Transballkanike. Sipas informacioneve paraprake, viktima dyshohet se ka qenë duke punuar në momentin e ngjarjes, kur materiale të rënda kanë rënë mbi të, duke e zënë poshtë.
Gazetarja Afrovita Hysaj mëson se 75-vjeçari Y.Shakaj pronar i kompanisë ku ka ndodhur ngjarja, ishte duke kaluar pranë paneleve sanduiç për zhvendosjen e tyre, në momentin që materialet e rënda kanë rrëshqitur dhe i kanë rënë mbi trup. Si pasojë e plagëve të marra, 75 vjeçari ka humbur jetën në vendngjarje.
Në vendngjarje kanë mbërritur ambulanca dhe shërbimet zjarrfikëse, të cilat po punojnë për nxjerrjen e trupit, që dyshohet se ka mbetur i bllokuar nën materialet e rënda.
Policia ka nisur hetimet për zbardhjen e plotë të rrethanave të ngjarjes dhe për të përcaktuar nëse viktima ishte në proces pune në momentin e aksidentit.
