Dy forumet rinore, FRESSH-i dhe LRI-ja janë “përplasur” për një tjetër çështje. Të dyja forumet do të jenë në datën 25, në kampingun e tyre të përvitshëm në Jalë. LRI-ja ka shpallur që prej 2 muajsh datat 21 me 27 gusht si periudhën kur do të mbledhë 1700 të rinj nga e gjithë Shqipëria.
Ndërsa vetëm këto ditë, sekretarja për rininë në PS, Elisa Spiropali, ka vendosur që të rinjtë e FRESSH-it të jenë në kampingun e Jalës në datën 25 gusht, shkruan Gazeta Shqiptare. Nuk dihet se si do ta përballojnë të rinjtë të jenë në të njëjtin mjedis të përbashkët. Kjo për shkak se tensionet mes “të mëdhenjve” në koalicion, depërtojnë edhe më ashpër në bazë zakonisht.
Nga LRI-ja do të jenë afro 1700 të rinj, kurse nga FRESSH-i 1 mijë, duke bërë që për një ditë kampi të jetë i tejmbushur. Ditët e fundit, tensioni qe i dukshëm edhe mes Spiropalit e të rinjve të LRI-së. Spiropali është duke u marrë me organizimin e FRESSH-it, i cili sot i jep fund votimit për “FRESSH Voice”, për zgjedhjen e drejtuesve të rinj.
Disa ditë më parë, Sekretarja për Rininë në PS, ish-drejtoresha e Doganave ironizoi me shprehjen e përdorur gjatë ditëve të miratimit të reformës në drejtësi, nga kreu i Kuvendit Ilir Meta, “Konsensus patriotik”. “Nëse do ekzistonte konsensusi patriotik, atëherë nuk do ekzistonin patriotët! Patriotët çajnë male për të kaluar trenin e historisë dhe nuk bëhen mullar së bashku nga frika se i ha bajlozi i matanë oqeanit”, tha Spiropali.
Menjëherë pas kësaj, në rrjetet sociale, veçanërisht në Facebook, reagoi nënkryetari i LRI-së, Klevi Pojana. “Elisa Spiropali u dorëhoq nga posti i kryetares së Doganave pasi nuk kishte më se çfarë të vidhte”, shkruante ai.
BW/d.i.
