Lideri i opozitës Lulzim Basha i ka kërkuar Kryeministrit Rama që të largojë menjëherë nga detyra Ministrin e Brendshëm Sajmir Tahiri, fill pas pezullimit të kreut të policisë Haki Çako nga gjykata, pas hetimeve të prokurorisë për pajisjen e përgjimit.
Basha i ka kërkuar kryeprokurorit Adriatik Llalla që të mos ndalojë tek kokat e turkut duke thënë se PD nuk do të pranojë që personi përgjegjës të mbetet jashtë hetimit.
“Në qeverisjen e “njëmijë e një” skandaleve ka një skandal që del mbi gjithë të tjerat dhe ky është skandali i përgjimeve, i cili është një cënim i qartë dhe një shkelje flagrante e sigurisë. Ky skandal i cili është publikuar nga opozita, sot ka dalë në dritë, sepse për shkak të hetimit, rezultatet e para janë bërë evidente. Këto janë hapa që unë i inkurajoj dhe që tregojnë integritet nga ana e prokurorisë, por që nuk janë të mjaftueshme.
Kryeprokurori i vendit, prokurorët, e dinë qartë se ne nuk do të pranojmë koka turku në këtë histori. Ne nuk do të pranojmë se njeriu që mbetet në krye të këtij operacioni të pisët, të shpëtojë.
Në cdo vend me standartin minimal demokratik, një ministër i brendshëm, që kapet me paligjshmërinë më të vogël, do të ishte larguar nga detyra menjëherë… por Tahiri, i kapur në skandal, jo vetëm që nuk ikën por i bën presion prokurorisë sapo nisën hetimet.
Ne kërkojmë transparencë, por Rama i është shamngur sot përgjegjësisë direkte që ka për të larguar Ministrin e tij të Brendshëm… sepse ai është politikisht përgjegjës për largimin e tij… pse e mban me thonj afër Rama Tahirin?! Unë nënkuptoj me këtë vetëm dicka, implikimin e drejtpërdrejtë të Ramës në këtë çështje. Dorëheqja e tij nuk mjafton, por largimi i tij. Rama duhet të firmosë menjëherë pezullimin e Çakos si dhe largimin e Ministrit të tij Tahiri.
Rama i trembet një hetimi të pavarur dhe përgjegjësive që do të nxjerrë ky hetim. Ndaj edhe sot edhe dje, ai ngurron të japë dakortësinë për një reformë në drejtësi të pakapur.”- tha Basha.
