Përfundon mbledhja e Byrosë së Kuvendit, pas kërkesës së Partisë Socialiste për përjashtimin për dhjetë ditë të tre deputetëve të opozitës, Gent Strazimiri, Albina Deda e Bedri Hoxha.
Këta të tre akuzohen për hedhje vezësh në drejtim të kryeministrit Edi Rama.
Edhe Partia Demokratike kishte bërë kërkesë për përjashtimin e kryeministrit Rama dhe deputetit socialist Erjon Braçe, për fyerje të opozitës.
“U diskutua gjatë për akuzën tonë, por edhe ne insistuam gjatë për akuzat ndaj deputetit Braçe dhe kryeministrit Rama ndaj opozitësh dhe nesh, deputeteve femra”, tha deputetja Deda në dalje. “Zoti Balla tha që nuk kemi pamje filmike dhe nuk i faktojmë dot fjalët e Ramës. Vendimi i Byrosë është dënimi i opozitës, por të mos preket kryeministri, ai është i paprekshëm”.
Ajo shtoi se sot është fundit i moralit, nëse dënohen deputetët e opozitës.
“Ne nuk do të marrim pjesë në komisione edhe këtë javë, do të shohim edhe reagimin e mazhorancës. Për hiri të së vërtetës nuk presim ndonjë reagim, pasi Rama ka treguar që është i papërgjegjshëm”, tha Deda.
