Trajtimi i problematikave që lidhen me shqiptarët qe jetojnë jashtë vendit ishte në fokus të takimit me komunitetin e emigrantëve të zonës së Selanikut dhe 13 qyteteve përreth ku merrin pjesë ministri i Brendshëm, Saimir Tahiri, ministri i Jashtëm, Ditmir Bushati, si edhe deputetët e Komisionit të Sigurisë Piro Lutaj, Xhemal Qefalia dhe Arben Çuko.
Përfaqësuesit e qeverisë dhe të parlamentit shqiptar diskutuan gjithashtu projektin për regjistrimin e shqiptarëve kudo ata ndodhen apo jetojnë.
Ministri Tahiri theksoi domosdoshmërinë për bashkëpunimin e çdokujt që jeton jashtë për vetëdeklarimin e adresës ku banon, për të çuar para projektin e regjistrimit të emigrantëve.
“Ky është një borxh historik që u kthejmë emigrantëve që kanë kontribuuar aq shumë për shtetin tonë, duke u dhënë shërbime aty ku ndodhen e jetojnë”, tha ministri Tahiri.
“Mendoni sa fushata janë bërë në emrin tuaj? Kjo është qeveria e parë që hedh një hap, pas 25 vitesh për emigrantët”, tha Tahiri.
Duke komentuar edhe zhvillimet politike të ditës, Tahiri tha se ka një pikëpyetje të madhe, se kur do të bëhet reforma në drejtësi.
“Për ne si qeveri, reforma duhet bërë që nesër – tha ai, në emër të një shoqërie më të drejtë”.
“Kur mendon se ka ende politikanë, që pushkën e shesin për alternativë, atëherë ky është problem. Jam i bindur se Shqipëria që ne duam është tjetër gjë. Kjo kërkon sakrifica dhe kohë, por jam i bindur se jemi në rrugën e duhur “, theksoi ministri.
