Ministri i Bujqësisë dhe Zhvillimit Rural, Niko Peleshi, zhvilloi një bashkëbisedim me peshkatarë në portin e ri të peshkimit në Durrës. Ky takim përkoi edhe me lirimin e këtij porti nga mjete të tjera detare, që qëndronin atje në mënyrë abuzive.
Ministri Peleshi garantoi se ky port nga sot e në vazhdim do të jetë vetëm në shërbim të anijeve të peshkimit.
“Ky është një investim i ri, që vetëm sot në fakt ka filluar të përdoret nga anijet e para, nga dy anije të peshkimit, për shkak se ka qenë i okupuar nga mjete të tjera, jahte private e të tjera, që nuk kanë lidhje me qëllimin për të cilin ky port është ndërtuar. Ky port nga sot e në vazhdim, duhet të mbahet i paprekur nga asnjë lloji mjeti tjetër, përveçse nga ato për të cilat është ndërtuar, pra nga anijet e peshkimit”, tha Peleshi.
Në vijim të fjalës së tij, kreu i Bujqësisë foli për masat e reja që ka ndërmarrë qeveria në favor të kësaj industrie, si një sektor me një rëndësi të veçantë.
“Gjithë strategjia jonë e mbështetjes së këtij sektori është si të ulim kostot. Dhe kjo nuk është një shpikje, nuk do ndonjë lloj filozofie të madhe. Natyrisht një sektor mbështetet duke e bërë atë konkurrues. Ulja e kostove arrihet përmes uljes së kostove finaciare, por edhe kostove burokratike, apo administrative. Heqja e akcizës për naftën, për peshkimin, tregoi që menjëherë i dha një impuls këtij sektori. Ne sot po punojmë që në paketën fiskale për vitin 2018, të futim përjashtimin nga tatimi i vlerës së shtuar për të gjitha mjetet e bordeve të anijeve”, është shprehur ministri.
“Investimi për një anije, mjete bordi, rrjeta, apo mjete elektro- mekanike etj shkon 20000 mijë euro në vit. Pra përjashtimi nga TVSH-ja për një anije, është i konsiderueshëm, shto pastaj 200 apo 218 anije mbi 12 m dhe në total numri shkon mbi 500 anije në vendin tonë. Është një mbështetje shumë e madhe. Formalizon sektorin, sepse deri dje, duke qenë se kostoja ka qenë e madhe, një pjesë ndiqte rrugë informale. Ndërsa sot, me përjashtimin nga tatimi i vlerës së shtuar, sektori formalizohet edhe të njëjtën kohë mbështetet me një ulje të kostos, që do të jetë e ndjeshme. Përveç lehtësimit të uljes kostove finaciare, ne do të ulim dhe kostot administrative apo burokratike apo logjistike”, shtoi ai. /b.d
