Nënkryetari i PDK-së, Enver Hoxhaj, në emisionin Interaktiv ka folur për zgjedhjet në Drenas të cilat i fitoi pas balotazhit, kandidati i partisë së tij, Ramiz Lladrovci.
Ai ka thënë se PDK-ja në zgjedhjet e ardhshme lokale do të rikthejë një pjesë të madhe të komunave, të cilat i ka humbur në zgjedhjet e kaluara. Hoxhaj ka përmendur rikthimin e Mitrovicës.
Hoxhaj fajin për murin ia ka hedhur kryetarit të Mitrovicës, Agim Bahtiri, të cilin e ka quajtur kryetar të një partie të vogël.
“Do t’i rikthejmë një pjesë të madhe të qyteteve. Mitrovica do të jetë një prej fitoreve. Është parë që kur kryetari nuk është i një partie të madhe, mund të shfaqen edhe mure që nuk i shohin”, ka thënë Hoxhaj.
“Nuk dua t’merrem me njerëzit e qeverisë lokale. Mitrovica është vend strategjik. Ftoj qytetarët atje që ta kuptojnë këtë peshë. Nëse ka një qytet prej të cilit varet stabiliteti në Ballkan, është Mitrovica. Në Mitrovicë do të rikthehemi ashtu siç do të rikthehemi në disa qytete tjera”, citohet Koha. (b.an)
