Zv.kryeminsitrja Ledina Mandija ka shpërndarë një deklaratë për mediat ku ajo informon në lidhje me ecurinë e hartimit të raportit të Task-Forcës për zgjedhjet. Ajo thotë se afati ishte data 10 Korrik, por disa ministri vijojnë të dërgojnë të dhëna shtesë.
Reagimi i saj vjen pas deklaratës së Ramës i cili tha se “pret largimin e ministrave teknikë pasi misioni i tyre mbaroi”.
Mandija thotë se po bëhet vlerësimi i gjithë të dhënave të mbledhura në përputhje me VKM-në e miratuar.
Deklarata:
Në përmbyllje të monitorimin të kryer nga e ana e Task – Forcës bazuar në VKM 473/2017, duke u bazuar në informacionet dhe raportimet e bëra nga të gjitha ministritë dhe institucionet që kanë ngritur grupet e monitorimit gjatë fushatës elektorale, është duke u bërë vlerësimi dhe përpunimi i të dhënave për të vënë sa më shpejt në dispozicion të publikut, subjekteve politike të interesuar, autoriteteve vendase dhe organizmave ndërkombëtar, raportin përfundimtar në lidhje me rezultatet e këtij monitorimi.
Sqarojmë opinionin publik se afati përfundimtar për dorëzimin e raporteve përfundimtare ishte data 10 korrik 2017, ndërkohë që ende sot disa nga Ministritë përcjellin materiale informuese.
Zyra e zëvendëskryeministres, Ledina Mandija, në cilësinë e kryesueses së Task- Forcës për zgjedhjet 2017, siguron opinionin e publik se do të zbatojë deri në fund detyrimin që rrjedh nga VKM 473/2017 dhe garanton hartimin e një raporti përfundimtar, serioz dhe cilësor, që do t’i shërbejë në të ardhmen forcave politike, për të realizuar një nga misionet më jetike të demokracisë së vendit, garantimin e zhvillimit të një procesi zgjedhor të qetë, të lirë dhe të ndershëm.