Kreu i qeverisë, Edi Rama, do të zhvillojë ditën e sotme, 4 korrik 2025, një takim me kandidatët socialistë të Tiranës.
Kjo mbledhje do të nisë në orën 09:00, e do të mbahet në ambientet e selisë rozë. Lajmi konfirmohet nga gazetarja e Klan Neës, Klesiana Omeri.
Takimi vjen një ditë pas përballjeve të Ramës me bashkinë Vlorë dhe Tiranë. Nuk dihen ende detajet e diskutimeve që do të mbahen në kampin socialist.
Mbledhja në Vlorë dhe shkarkimi i administratës
Një ditë më parë, 3 korrik 2025, kryeministri zhvilloi një mbledhje të pazakontë ë bashkinë e Vlorës, ku kryetari Ermal Dredha, është vënë në qendër të kritikave nga kryeministri Edi Rama për keqmenaxhim të qytetit bregdetar.
Në prani të deputetëve socialistë të qarkut, kreu i qeverisë ka shprehur pakënaqesi për mungesën e ujit të pijshëm dhe papastërtine në qytet dhe përkeqësimin e shërbimeve publike.
Sipas burimeve, Rama ka kërkuar që të shkarkohen të gjithë drejtorët e bashkisë, duke i konsideruar ata të paaftë për t’i sherbyer qytetit dhe të shkëputur nga realiteti.
Ai ka kerkuar riorganizimin e menjëhershëm të bashkisë, dhe ka vendosur që procesi i rekrutimit të drejtorëve të rinj ndiqet nga dy përfaqësues të qeverisë.
Mbledhja në Tiranë dhe porositë e Ramës
Pasditen e djeshme, Rama mbajti dhe takim me drejtuesit e Bashkisë Tiranë, përfshirë kryetaren e komanduar, Anuela Ristani, ligjvënësit e rinj të zgjedhur nga 11 maji, por gjithashtu dhe me praninë e Ministrit të Financave, Petrit Malaj.
Ky takim ishte i shkurtër, pasi zgjati rreth 30 minuta, dhe në krahasim me mbledhjen në Vlorë, tonet ishin të qeta.
Mësohet se Rama u ka kërkuar deputetëve të jenë më shumë të pranishëm në terren, të evidentojnë problematikat e qytetarëve dhe të koordinojnë punën me pushtetin vendor për gjetjen e zgjidhjeve.
Për këtë janë ngritur disa grupe pune, të cilët kanë për detyrë të sjellin problematikat brenda dy javëve, kur pritet të zhvillohet një tjetër takim i zgjeruar.
Vëmendje të vecantë, kreu i qeverisë mësohet se i ka kushtuar zënies së trotuareve, duke kërkuar ndërhyrjen e IMT dhe INUK, por edhe ankesave që lidhen me shërbime të tjera.
Referuar faktit se kryetari aktual i Bashkisë Tiranë, Erion Veliaj, ndodhet në paraburgim, nuk është qartësuar nëse kryeqyteti do të jetë pjesë e bashkive ku do të mbahen zgjedhjet e pjesshme.
