Një burim ushtarak iranian ka paralajmëruar se Teherani do të godasë infrastrukturën rajonale, përfshirë objektet energjetike, në rast se Shtetet e Bashkuara sulmojnë ura apo termocentrale në Iran.
Deklarata vjen pas kërcënimit të Presidentit amerikan Donald Trump se SHBA-të do të godasin infrastrukturën iraniane sa herë që Teherani sulmon anije tregtare në Ngushticën e Hormuzit, një nga rrugët ujore më strategjike në botë.
Në një intervistë për agjencinë gjysmëzyrtare të lajmeve Tasnim, burimi ushtarak iranian tha se vendi ka një “vendosmëri të fortë” për të mbrojtur sovranitetin e tij mbi Ngushticën e Hormuzit dhe nuk do të lejojë që ajo të përdoret si burim kërcënimi ndaj Iranit.
Sipas tij, transporti detar në këtë zonë do të mbetet i sigurt nëse anijet bashkëpunojnë me autoritetet iraniane dhe respektojnë marrëveshjet e vendosura nga Teherani.
Megjithatë, burimi paralajmëroi se në rast të sulmeve amerikane ndaj infrastrukturës iraniane, përgjigjja e Iranit do të përfshinte goditje ndaj objekteve strategjike në rajon, përfshirë edhe ato energjetike ku SHBA-të kanë interesa.
