Kryeprokurorja Arta Marku ka nisur largimin e njerëzve të Llallës nga postet kyçe në organin e akuzës. Mes të larguarve të parë ishte edhe Rovena Gashi, ish-drejtuese e Drejtorisë për Marrëdhëniet me Jashtë dhe Strukturën e Dekriminalizimit.
Me firmën e kryeprokurores Marku, ajo tashmë është prokurore e thjeshtë në Prokurorinë e Përgjithshme, në strukturën e Dekriminalizimit.
Por, me sa duket Gashi, e njohur si nje ri i afërt me kryeprokurorin Llalla nuk është pajtuar me vendimin. Ajo ka depozituar padi në Gjykatën Administrative kundër largimit nga detyra.
Në padinë e saj, prokurorja pretendon se është larguar nga posti i rëndësishëm që mbante pa asnjë motivacion ndërsa shton se lirimi i saj është bërë pasi kërkoi ndërprerjen e mandatit të Rakipit dhe Rehovicës, duke i dhënë edhe ngjyrim politik kësaj çështjeje.
“Vendimi për lirimin tim është absolutisht i pavlefshëm. Të pezullohet vendimi i lirimit si Drejtore e Marrëdhënieve me Jashtë. Prokurorja e Përgjithshme e Përkohshme ka uzurpuar kompetencat e Këshillit të Larte të Prokurorisë. Lirimi nga detyra është bërë pas kërkesës për ndërprerjen e mandatit për Aqif Rakipin dhe Gledion Rehovices” thuhet në padinë e Gashit që është depozituar në Gjykatën Administrative.
/a.m.
